اسلام آباد۔ 21 ستمبر (اے پی پی) چیئرمین سینیٹ محمد صادق سنجرانی پارینے کہ پاکستان و قبرص نا نیام اٹ دیرینہ سیاسی، راجی و واپاری تعلقداری ءِو دارابطہ غاتے پین سوگو کننگ کن ہڑتوم آ ملک آتا نیام اٹ ڈل آتا ہن و بر اٹ ودکی کروئی مریک، ہڑتوم آ ملک آتا نیام اٹ واپار و تعلیم نا بشخ اٹ کمکاری ءِ پین مون آ دننگ کن بھلو گنجائشت اس ساڑی ءِ۔ داخیال آتا درشانی ءِ او دوشنبے نادے آ تینا چیمبر اٹ قبرص نا اعزازی کونسل جنرل میاں حبیب اللہ تون اوڑدہی ٹی گپ وتران کرسا کرے۔ چیئرمین سینیٹ پارے کہ ہڑتوم آ ملک آتا نیام اٹ پارلیمانی رابطہ کاری ءِ زیات گچین کننگ آن نئے بیرہ تین پہ تینی واپار نا مون آ دننگ اٹ کمک رسینگک بلکن سیاسی تعلقداری تے پین سوگو کننگ مریک۔ داوخت آ قبرص نا کونسل جنرل چیئرمین سینیٹ ءِ ہڑتوم آ ملک آتا نیام اٹ واپار نا مون آ دننگ کن کروک آ کوشست و پاکستان اٹ خوانوک آ قبرص نا پنچ ہزار طالب علم آتے مون تروک ویل آتیان معلومدار کرے۔ چیئرمین سینیٹ پاکستان اٹ خوانوک آ دا طالب علم آتے گچین آسراتی تا فراوانی و اوفتے مون تروک ویل آتا دمدستی ایسری کن گام گیج آتا باوری کرفے۔ چیئرمین سینیٹ پارے کہ طالب علم آک ہر ملک اٹ ہمو ملک انا سفیر و نمائندہ نا وڑاٹ ساڑی مریرہ ہراکہ تین پہ تینی تعلقداری تے شون تننگ اٹ اہم کڑد ادا کننگ کیرہ۔ اوپارے کہ پاکستان نا طالب علم آتا اسہ بھلو کچ اس ہم قبرص اٹ خواننگ ءُ اومیت ءِ کہ قبرص نا حکومت پاکستانی طالب علم آتے گچین آسراتی تا فراوانی کن پبی کمک فراوان کیک۔ چیئرمین سینیٹ ہڑتوم آ ملک آتا نیام اٹ واپاری کچ اٹ ودکی کن ہڑتوم آ ملک آتا چیمبر آف کامرس نا نیام اٹ گچین رابطہ و واپاری ڈل آتا ہن و برتیا ہم زور شاغا۔ اوپارے کہ ایوان بالا دا چرجوئی ٹی تینا پبی کڑد ءِ ادا کننگ کن تیار ءِ۔
