اسلام آباد۔ 21 ستمبر (اے پی پی) پاکستان تحریک انصاف (پی ٹی آئی ) نا سینیٹر فیصل جاوید پارینے کہ اپوزیشن نا غٹ جماعت آتا کانفرنس(اے پی سی) نا مسخت حکومت آن قومی مفاہمت آرڈیننس (این آر او) ہلنگ نا ءِ تانکہ او وڈی خوری نا مقدمہ غاتیان بچنگ کیر۔ نجی ٹی وی چینل نا پروگرام اٹ گپ وتران کرسا اوتنقید کرسا پارے کہ اپوزیشن جماعت آک درکار کانود سازی نا اہمیت آن بلد مننگ آن پد ہم ایف اے ٹی ایف نا بابت بل آتیا بلیک میلنگ نا چم آتے کاریم اٹ اتنگ ءُ۔ اوپارے کہ حزب اختلاف نا سلاہ ئی ترمیم تا مسخت مقدمہ غاتون مون تروک سینئر اپوزیشن راہشون تے فائدہ تننگ نا ءِ۔ ہرافتے ٹی مسکوہی وزیراعظم نواز شریف، اونا مار و مسڑ، شہباز شریف و اونا مار، مسکوہی صدر آصف علی زرداری و جعلی بینک اکاؤنٹ اسکینڈل اٹ اوار اونا سنگت آک اوار ءُ۔ اوپارے کہ حکومت اپوزیشن نا غیر منطقی خواست آتے امنا کرسا احتساب نا عمل ءِ وخت اس ہم غیر موثر مننگ کن ہلیپک ۔ اومستی پارے کہ حزب اختلاف حکومت ءِ اینک کننگ نا کوشست کریکہ وخت اس کہ پی ٹی آئی کرپشن، نیزگاری و منظم مافیا ءِ چٹفنگ کن کوشست کریکہ۔ اومستی پارے کہ حزب اختلاف نا اے پی سی آن پد ہم پی ٹی آئی نا حکومت تینا مقررہ مد ءِ پورو کیک انتئے کہ اوفتے تون نئے تو حکمت عملی اس ارے و نئے نن اوفتیان خوفزدہ اُن۔ فیصل جاوید پارے کہ اے پی سی بھاز بے وڑ بے سہب مسنے۔ اوپارے کہ کرپٹ اپوزیشن تینا غیر کانودی ملکیت آتا رکھ اکن ملک آ حکمرانی کننگ خواہک ولے اے پی سی نا نتیجہ صفرمریک۔ اوپارے کہ وزیراعظم عمران خان پیدوار وڑاٹ پارینے کہ او ہر باندات آ اپوزیشن تون تولنگ کن تیار ءِ ولے او وڈی خوری آ سمجھوتہ کن تیار اف۔ اسہ سوج اسے نا ورندی ٹی سینیٹر فیصل جاوید پارے کہ حکومت نواز شریف ءِ لندن آن وطن آ پدی اتنگ کن غٹ دوئی کانودی آپشن تے کاریم اٹ اتیک، تانکہ او عدالت آتیٹی مقدمہ غاتون مون تننگ کے و داسہ وخت بسنے کہ عدالت آتے ریفسا عدالتی نظام آ ملنڈ خلوک آ نواز شریف وطن آ پدی برے او اے پی سی میٹنگ اٹ بھاز جُوان خننگاکہ۔
