اسلام آباد۔ 21 ستمبر (اے پی پی) مچ آ ملک اٹی قومی انسداد پولیو مہم دوشنبے آن بناکرینے ہراٹی پنچ سال آن کم وئی 4 کروڑ آن زیات چناتے انسداد پولیو نا پڑی کُنفنگک، فروری 2020آن پد دا اولیکو قومی انسداد پولیو مہم مریک ہراٹی 5 سال آن کم وئی نا چناتے پولیو آن بچفنگ نا پڑی کُنفنگک، کورونا وائرس نا سوب آن منہ تُو اکن پولیو مہم آتے پدبٹنگاسس، افریقہ نا پولیو آن پاک مننگ آن پد بیرہ پاکستان و اوغانستان دنیا ٹی 2 ملک رہینگانو ہراڑے پولیو کیس آتا مون تروک ءِ۔ جاری مروک آ بیان اٹی وزیراعظم نا کمکار جان جوڑی ڈاکٹر فیصل سلطان پارے کہ افریقہ نا پولیو آن پاک مننگ آن پد پاکستان ءِ پولیو آن پاک کننگ کن زیات تندہی و جہد اٹ کاریم کننگ نا گرج ءِ۔ نن ملک آن پولیو نا پورو چٹفنگ کن گچین آن گچین پولیو مہم اس چلیفنگ نا کوشست کننگ اُن۔ داڑتون اوار اوار ہڑدے ئی رکھی ٹیکہ غاتا نظام اٹ ہم گچینی کن گام گیج کننگ انگ ءِ۔ داکان مست جولائی و اگست اٹ چنکو کچ اسے آ پولیو مہم آتے اڈتننگاسس ولے داوار 2 لکھ 20 ہزار آن زیات پولیو ورکرز اُرا اُراغا ہنسا پنچ سال آن کم وئی نا چناتے پولیو آن بچفنگ ناپڑی کُنفنگ ءِ پک کینہ۔ جولائی واگست اٹ مروک آ مہم آتیانبار داوار آ ہم پولیو ورکرز آتے کورونا نا دین آن بچفنگ کن جوان تربیت تننگانے دُن کہ دُوتے سلنگ، ماسک انا کاریم اٹ اتنگ و جوان فاصلہ ءِ پک کننگ اوار ءِ۔ داکان بیدس پروگرام مہم اٹی کورونا نا دین اٹی قاعدہ و ضابطہ غا عملدرآمد ءِ پک کرینے۔قومی انسداد پولیو مہم نا بارواٹی ہیت کرسا کوارڈی نیٹر قومی ایمرجنسی آپریشنز سینٹر ڈاکٹر رانا صفدر پارینے کہ لمہ و باوہ تینا چناتے مچ آ وئی نا معذوری آن بچفنگ کن پولیو آن بچفنگ نا پڑی ضرور کنفر۔ نن کورونا غان بچنگ کن پورو بست وبند کرینن تانکہ لمہ و باوہ و پولیو ورکرز کورونا وائرس نا دین آن پورو وڑاٹ رکھ مریر انتئے کہ ننکن الس نا جان جوڑی نا خیال ءِ تخنگ اولیت ءِ۔ پولیو وائرس نا رسک ءِ کم کننگ کن انسداد پولیو پروگرام اینخو نا سال پین پولیو مہم آتے چلیفنگ نا بست وبند ہم کرینے۔ داکان بیدس جان جوڑی ہند آتیٹی چناتے رکھی ٹیکہ جات آتا چرجوئی ہم برجاسلک۔
