پشاور۔ 20 ستمبر (اے پی پی) وزیراعلیٰ خیبر پختونخوا محمود خان پشاور ریوائیول پلان نا رداٹ کوہاٹ روڈ، جی ٹی روڈ، ورسک روڈ، چارسدہ روڈ و ایلو روڈ آتا اپ لفٹ و بیوٹیفیکیشن تون اوار غٹ منظور مروک ڈٹ آتیا بلاتاخیر عملی کاریم نا بناءِ کننگ نا پارت کرینے۔ اوپلان آ عملدرآمد اٹ بروک اڑاند آتے مُر کننگ نا گرج آ زور شاغسا بجلی نا ترسیل نا نظام ءِ مریس وختی پلان نا رداٹ مرحلہ وار زیر زمین کننگ نا سلاہ آن اصولی امنا کرینے و پارت کرینے کہ دا چرجوئی ٹی پیسکو کمامدارآتون ہیت کننگے۔ محمود خان پیدوار کرے کہ پشاور صوبہ نا دارالحکومت و اسہ بھلو شار اسےہرادے ہر حال اٹ سہی کروئی ءِ۔ او وزیراعلیٰ ہاؤس پشاور اٹ پشاور ریوائیول پلان نا بابت اسہ دیوان اسے نا کماشی ءِ کریکہ۔ وزیراعلیٰ نا خصوصی کمکار حوالکاری و بلدیات کامران بنگش، وزیراعلیٰ نا پرنسپل سیکرٹری شہاب علی شاہ، تعلقدار محکمہ غاتا انتظامی سیکرٹریز، کمشنر پشاور، ڈائریکٹر جنرل پی ڈی اے، ڈی سی پشاور و ایلو تعلقدار کمامدار آک ہم دیوان اٹی بشخ ہلکر۔
