اسلام آباد۔ 20 ستمبر (اے پی پی) آزاد جموں و کشمیر نا صدر سردار مسعود خان عالم دین تیا زور شاغانے کہ او منبر و محراب اٹ کشمیری تیا مروک آ ظلم ءِ تالان کیر انتئے کہ مقبوضہ کشمیر و ہندوستان نا مسلمان تے کلمہ گو مننگ و محمد عربی صلی اللہ علیہ و آلہ وسلم نا پیروکار مننگ نا سزا تننگ انگءِ۔ داہیت ءِ او کشمیر ہاؤس اسلام آباد اٹ مولانا امتیاز احمد عباسی نا کماشی ٹی عالم دین تا اسہ ڈل اسے تون اوڑدہی ٹی گپ وتران کرسا پارے۔ صدر سردار مسعود خان پارے کہ عالم دین، مذہبی راہشون و مذہبی جماعت آک مدام کشمیر نا ویل ءِ تالان کننگ، مقبوضہ کشمیر نا مسلمان تا حالیت زر و اوفتیا غیر انسانی ظلم انا بارواٹ آگاہی ودی کننگ اٹ کلیدی کڑد ادا کریر و داسہ وخت بسنے کہ نن تینا صف آتیٹی سیوت و سخا ودی کرسا تینا مظلوم و بیوس ایلم و ایڑھ تا کم و دادرسی کن مخ ءِ تفن۔ تنازعہ کشمیر ءِ امت مسلمہ نا ویل گوندسا صدر آزاد کشمیر پارے کہ تدوک آ سال پنچ اگست نا بھارتی گام گیج آتیان پد بھارت نا حکمران جماعت بی جے پی و آر ایس ایس نا مسلمان تے دا ڈیہہ آن نیست ونابود کننگ نا بابت حوصلہ زیات مسنے۔
