اسلام آباد۔ 18 ستمبر (اے پی پی) وزیر سائنس و ٹیکنالوجی چودھری فواد حسین پارینے کہ بھارت نا مکروہ دروشم دنیا نا مون آ پاش مسنے و پاکستان مقبوضہ کشمیر اٹی بھارتی جارحیت نا برخلاف توار بڑز کرسا کیک۔ ریڈیو پاکستان نا پروگرام کرنٹ افیئر اٹ گپ وتران کرسا اوپارے کہ نن پاکستان نا خارجہ پالیسی بایدے سفت ءِ کین۔ بھارتی وزیراعظم نریندر مودی گاندھی نا بھارت ءِ جوان وڑاٹ چٹفینے و داسہ بھارت فاشزم آن بیدس ہچ ءُ گڑاس اف۔ اوپارے کہ مودی گجرات ءِ اسہ دہشت گرد ءُ ریاست اسے ٹی بدل کریسس و داسہ بھارت ءِ اسہ انتہا پسند قوم اسے ٹی بدل کننگ ءِ۔ او تنقید کرسا پارے کہ مودی نا کماشی ٹی ساڑی آ بھارت آ بالادست ہندوتوانظریہ نا دُو ءِ۔ چودھری فواد حسین پارے کہ بھارت تینا ہمسایہ غاتون گچین ءُ وخت اس تیر کپننگ ءِ، نیپال و بنگلہ دیش اتون اونا تعلقداریک بے چیٹ ئسر و داسہ حالیت آتا بے چیٹی ٹی پین ودکی کننگ انگ ءِ۔ اوپارے کہ بھارتیہ جنتا پارٹی (بی جے پی) نا کماشی ٹی حکومت تینا فاشٹ پالیسی تا سوب آن جہانی پڑ آ بھارت نا شرفمندی ءِ نسخان تسنے۔ اوپارے کہ بھارت اٹ اقلیت آک مودی نا نسل پرستانہ وڑو عمل آن تنک مسنو و او بدحالی اٹ رہینگ انگ آ بیوس ءُ۔
