اسلام آباد۔ 18 ستمبر (اے پی پی) بلوچستان حکومت کوئٹہ شار شار ءِ پوسکن آ وڑوڈول آتیا اتنگ کن چندی شونداری ڈٹ آتا بناءِ کرے ہرانا مسخت صوبائی دارالحکومت نا ماسٹر پلان آ نظرثانی کرسا شاری ویل آتا ایسر کننگ ءِ۔ صوبائی حکومت چندی شونداری ڈٹ آتے پورو کرسا کوئٹہ شار انا بنداوی پنجر ءِ گچین کننگ کن 20 ارب روپئی خڑچ کننگ ءِ۔ بلوچستان حکومت نا اسہ عہدیدار اس پارے کہ حکومت ہندی مخلوق ءِ ایلو بنداوی آسراتی تا فراوانی آن بیدس اُراتیان محروم بندغ آتا ہنکینی ڈٹ آتیا ہم کاریم کننگ ءِ وخت اس کہ کوئٹہ شار انا زیبائی و بحالی کن جنگی بنداو تیا کاریم کننگ ءِ۔ اوپارے کہ کوئٹہ شار اٹ دیر ءِ واٹر سپلائی اسکیم نا رداٹ ڈیم تیان کوئٹہ غا اتنگک ہراڑآن صوبائی دارالحکومت اٹ دیر انا تنکی تے کم کننگ اٹ کمک رسینگک۔ دا چرجوئی ٹی واٹر ٹریٹمنٹ پلانٹ ہم خلنگک۔ اومستی پارے کہ دا ڈٹ اینخو مالی سال اسکان پورو مننگ نا اومیت ءِ ۔ اوپارے کہ شاری تے جہانی آب انا گوازی تا آسراتی تا فراوانی کن شش پین سپورٹس کمپلیکس و اسٹیڈیم تفنگ انگ ءِ۔ اوپارے کہ پوسکن آ اسپورٹس کمپلیکس اٹ جمنازیم، غٹ انڈورگوازی، سکواش، کرکٹ نیٹ، سرشار واکنگ ٹریک و ایلوتیانبار نا آسراتی ساڑی مریک ہرا ورناتے گوازی تیٹی زیات آن زیات بشخ ہلنگ کن است بڈی ءِ کیک۔ عہدیدار پارے کہ حکومت شار اٹی گوازی تا میدان تا تفنگ کن 600 ملین روپئی جتا کرینے۔ اومستی پارے کہ گوازی تا میدان تا تفنگ نا کاریم آخیریکو مرحلہ غاتیٹی ءِ۔ اوپارے کہ حکومت شونداری ڈٹ آتا وخت آ پوروی کن کاریم کننگ ءِ او مستی پارے کہ تعمیراتی کاریم تیٹی کاریم اٹ اتوک آ میٹیریل نا آب ءِ پک کننگ انگ ءِ۔
