اسلام آباد۔ 18 ستمبر (اے پی پی) وزیراعظم نا خصوصی کمکار قومی جان جوڑی ڈاکٹر فیصل سلطان پارینے کہ اسکول و کالج آتیٹی حالیت آتا سخت چاروکی ءِ کننگ انگ ءِ، کورونا دین انا مون ءِ توننگ کن سوگو و گچین گام گیج کننگ انگ ءِ، تعلیم نا بابت جاری کروک گائیڈ لائن تیا سختی اٹ عمل کننگ انگ ءِ، رکھی گام گیج آتیا عملدرآمد ءِ پک کننگ انگ ءِ۔ داخیال آتا درشانی ءِ او جمعہ نادے آ ای سی جی کالج فارگرلز انا دورہ ءِ کننگ نا وخت آ کرے۔ خصوصی کمکار اسکول آتیٹی کورونا دین انا بابت بست و بند آتا جاچ ءِ ہلک۔ داوخت آ ڈاکٹر فیصل پارے کہ اسکول و کالج آتیٹی حالیت آتا سخت چاروکی ءِ کننگ انگ ءِ۔ کورونا دین انا مون ءِ توننگ کن سوگو و گچین گام گیج کننگ انگ ءِ۔ اوپارے کہ تعلیم نا بابت جاری کروک گائیڈ لائن تیا سختی اٹ عمل کننگ انگ ءِ رکھی گام گیج آتیا عملدرآمد ءِ پک کننگ انگ ءِ۔ ڈاکٹر فیصل سلطان پارے کہ چناتا جان جوڑی و سلامتی ءِ پک کننگ ننا غٹ انا زمواری ءِ۔ غٹ چناک ماسک ضرور بینر۔ لمہ و باوہ، استاد و طالب علم آک کورونا نا تالانی ءِ توننگ کن ایس او پی تیا سختی اٹ عمل کیر۔ اوپارے کہ کلاس روم تیٹی جوان فاصلہ ءِ پک کننگے۔ دوتے وار وار آ سلر، ماسک بینر، سینیٹائزر آتے کاریم اٹ اتیر۔ ایس او پی تا خلاف ورزی کروک آ تعلیمی ادارہ غاتے بند کننگک۔
