اسلام آباد۔ 18 ستمبر (اے پی پی) بھارتی سینئر سفارتکار ءِ دفترخارجہ غا بٹنگسا 17 ستمبر آ کوزہ گر بھارتی فوج انا کنڈآن لین آف کنٹرول (ایل او سی) نا تتہ پانی و جندروٹ سیکٹرز اٹی جنگ بندی نا خار تس خلاف ورزی تیا برانز کننگا، بھارتی فوج انا خارتس سم کاری ٹی مسہ بے گناہ شاری ٹھپی مسر۔ جمعہ نادے آ ترجمان دفتر خارجہ نا رداٹ سینئر بھارتی سفارتکار ءِ دفترخارجہ غا بٹنگسا برانزی مراسلہ ءِ اونا دوٹی تسر و پاریر کہ کوزہ گر بھارتی فوج ایل او سی و ورکنگ باؤنڈری نا پدریسہ خلاف ورزی ءِ کرسا آرٹلری، بھلو و خودکار سلہہ غاتا کمک اٹ لس شاری آبادی تے شست کننگ ءِ۔ بھارتی سفارتکارءِ پاننگاکہ شاری آبادی ءِ شست کننگ است ہسونی نا قابل، انسانی عظمت و وقار، جہانی انسانی حق و جہانی انسانی کانود آتیان اسُل چپ ءِ۔ بھارت نا کنڈآن جنگ بندی نا دا خلاف ورزی تیان علاقائی امن و سلامتی ءِ خطرہ مون تروک ءِ ہرانا نتیجہ سٹریٹجک ردینک نا حالیت اٹ پیش تمنگ کیک۔ بھارت اینخو سال اٹی 2280 وار خارتس جنگ بندی نا خلاف ورزی کرینے ہراٹی 18 بے گناہ شاری شہید و 183 ٹھپی مسنو۔ بھارتی سفارتکار ءِ معلومدار کننگا کہ ایل او سی آ بے چیٹی ٹی ودکی آن بھارت مقبوضہ کشمیر اٹ انسانی حق انا سنگین خلاف ورزی و ظلم آن جہانی چکار ءِ اسہ کنڈ کننگ کپک۔ بھارت آ زور شاغنگاکہ او 2003 نا جنگ بندی معاہدہ نا پاسداری ءِ کے، جنگ بندی نا خلاف ورزی نا دا واقعہ غاتا جاست وپاست ءِ کرفے، بھارتی فوج ءِ جنگ بندی نا شرف نا پرمان کے، ایل او سی و ورکنگ باؤنڈری آ اونا رداٹ امن ءِ برقرار تخے و اقوام متحدہ نا سلامتی کونسل نا قرارداد آتارداٹ بھارت اقوام متحدہ نا فوجی مبصر(یواین ایم او جی آئی پی) ءِ تینا کڑد ءِ ادا کننگ نا موکل ایتے۔
