لاہور۔ 18 ستمبر (اے پی پی) بنجائی وزیر داخلہ بریگیڈیئر(ر) اعجاز احمد شاہ پارینے کہ اینٹی منی لانڈرنگ کانود جوڑ کننگ تحریک انصاف کن آخا ملک اکن کننگا، ہموکاریم ہرافتے ساڑی آ حکومت کننگ ءِ او بھاز مہالو بایدے مروسر، ملکی شونداری کن دا المی ءِ کہ ہرا غلط کاریم کیک اونا احتساب مرے۔ الس اٹ ہم بایدے دا شعور مرے کہ او وونٹ بٹنگ نا وخت آ سہی گچین کاری کیر، وزیراعظم عمران خان 60 درسد وخت زرگزران ءِ سہی کننگ اٹ خلنگ ءِ، ساڑی حکومت ءِ زرگزران خراب حالیت اٹ رسینگا، اوکان پد کورونا نا حالیت آتا ہم زرگزران آ زور تما۔ او جمعہ نادے آ لاہور چیمبر آف کامرس اٹ پاسپورٹ آفس نا بنائی دود آن تران و میڈیا تون گپ وتران کریکہ۔ دا وخت آ لاہور چیمبر نا صدر عرفان اقبال شیخ تون اوار ایلو عہدیدار آک ہم ساڑی ئسر۔ بنجائی وزیر داخلہ پارے کہ اینٹی منی لانڈرنگ کانود جوڑ کننگ ملک اکن کننگا، دا کانود پگہ ننے آ ہم لگنگ کیک۔ اوپارے کہ منی لانڈرنگ ہمو کپک ہرادے اِرا وخت انا اِرغ ملپک۔ اوپارے کہ ملکی شونداری کن احتساب المی ءِ تینٹ ہم پاوہ کہ کنے آن غلط ءُ کاریم اس مرے تو مخلوق کنا گاڈی ءِ خشت اٹ خلیر و ہنداوڑ ہر اسٹ تو بایدے مرے ہراسٹ غلط ءُ کاریم کیک انتئے کہ احتساب آن ہچ کس مبرااف۔ اوپارے کہ ننا کابینہ ٹی گڑاس وخت اختلاف رائے مریک ہراکہ جمہوریت اٹ مریک۔ میڈیا نا اسہ سوج اسے آ اوپارے کہ ایف آئی نا سائبر کرائم ونگ ءِ سوگو کننگ نا گرج ءِ ، زوت سائبر ونگ انا کارکڑد گچین مریک۔ بنجائی وزیر پارے کہ اولیکو وار وزیراعظم عمران خان ریاست مدینہ نا ہیت ءِ کرینے ہرانا بایدے ستاءِ کننگے۔ اوپارے کہ ملک اٹ جوڈیشل سسٹم، لااینڈآرڈر ءِ پین گچین کننگ نا گرج ءِ۔ اوداہیت آ زور شاغا کہ سخی و صاحب ثروت خواجہ غاک راج انا نزور تپہ غاتا کمک ءِ کیر۔ اوپارے کہ وزیراعظم عمران خان 60 درسد وخت زرگزران ءِ سہی کننگ اٹ خلنگ ءِ، ساڑی حکومت ءِ زرگزران خراب حالیت اٹ رسینگا، اوکان پد کورونا نا حالیت آتا ہم زرگزران آ زور تما۔ اوپارے کہ ملکی شونداری کن خراج پیئر و خراج کولیکٹر ہڑتوم آک بایدے جوان مریر و ملک اٹ صنعت ءِ مون آ دننگ دوئی مرے۔ اوپارے کہ ملک اٹ بیروزگاری آن نجات انڈسٹریلائزیشن نا کمک اٹ مننگ کیک، ننا ہندی زرکار آتے مرے کہ او ملائیشیا و بنگلہ دیش اٹ زرکاری نا جاگہ غا تینا ملک اٹ زرکاری کیر تانکہ پیشن نا ملک زرکار آتا پت اٹ ہم ودکی مرے۔ اوملک اٹ درآمد و برآمدآتیٹی عدم توازن ءِ مر کننگ نا گرج آ ہم زور شاغا۔ بنجائی وزیر پارے کہ ساڑی حکومت کورونا دین ءِ چٹفنگ نا بابت تینا پالیسی ٹی سرسہب مس، ہراتم کورونا بس تو ملک اٹ بیرہ 4 ہندن ءُ لیبارٹری ئسر ہراکورونا ٹیسٹ کریرہ، داوخت آ 160 لیبارٹری کورونا ٹیسٹ کننگ ءُ، ملک اٹ ماسک الوکہ ولے داسہ پاکستان این 95 ماسک برآمد کننگ ءِ، ملک اٹ بیرہ 500 آن 600 وینٹی لیٹر ساڑی ئسر، داسہ ملک اٹ 5000 آن 6000 وینٹی لیٹر ساڑی ءُ۔
