اسلام آباد۔ 18 ستمبر (اے پی پی) وزیر خارجہ مخدوم شاہ محمود قریشی پارینے کہ کشمیر اٹی بھارتی حکمت عملی پورو وڑاٹ بے سہب مسنے، بھارت واک انا کاریم اٹ اتنگ آن دا ویل ءِ ایسر کننگ کپک، کشمیر نا ویل ءِ ہر فورم آ ہرفسا کینہ، وزیراعظم عمران خان 25 ستمبر آ جنرل اسمبلی نا دیوان اٹی کشمیر نا ویل آ ہیت کیک۔ جمعہ نادے آ تینا اسہ بیان اسے ٹی وزیر خارجہ پارے کہ بھارت کودک کشمیری تیا واک انا کاریم اٹ اتنگ تدوک آ 7 دہائی آن کننگ ءِ، واک انا کاریم اٹ اتنگ آن دا ویل ایسر مفک۔ کشمیر اٹی بھارتی حکمت عملی پورو وڑاٹ بے سہب مسنے۔ حکمت عملی بے سہب مننگ نا توارک بھارت نا تہہ غان بننگ ءُ۔ شاہ محمود قریشی پارے کہ بھارت اسہ کنڈی کانود و بندش آتا کمک اٹ کشمیری تا توار ءِ توننگ خواہس، 5 اگست 2019 ء آن پد کشمیری تیا ہراظلم ءِ کننگا اونا درور ملپک۔ وزیر خارجہ پارے کہ بھارت وختی وڑاٹ توار ءِ توننگ اٹ سرسہب تو مننگ کیک ولے دا ظلم آن ویل ایسر مفک۔ بھارتی گام گیج آتا سوب آن اینو کشمیری تیٹی اشتعال ءِ۔ اینو مقبوضہ کشمیر اٹ آجو کشمیر نا بیرک ءِ چست کننگ انگ ءِ، کشمیر اٹ پاکستان زندہ باد نا نعرہ لگنگ ءِ۔ شاہ محمود قریشی پارے کہ نن کشمیر نا ویل ءِ ہر فورم آ چست کرسا کینہ۔ وزیر خارجہ شاہ محمود قریشی پارے کہ وزیراعظم عمران خان 25 تاریخ آ جنرل اسمبلی نا دیوان اٹی تینا تران اٹی کشمیر نا ویل آ ہیت کیک، کشمیر نا ویل ءِ اقوام متحدہ امر گوجالا، داڑآ ہیت مریک۔ وزیر خارجہ پارے کہ اقوام متحدہ ہراڑے بھاز انگا سرسہبی تے دوئی کرینے ہموڑے فلسطین و کشمیر نا ویل ءِ ایسر کننگ اٹ بے سہب مسنے۔ کشمیر اٹ انسانی حق ءِ بے دڑدی اٹ لتاڑنگ انگ ءِ۔ وزیر خارجہ پارے کہ ریکوڈک نا باندات اٹی سرسہبی آ غٹ ءِ مبارکبادی ایتیوہ، پاکستان ءِ وختی وڑاٹ اسہ بھاز بھلو ریلیف اس رسینگانے۔ اوپارے کہ چین ننا سنگت ءِ، مشکل وخت اٹی چین مدام نن تون تفینے، سعودی عرب تون ننا بھاز بھلو تاریخی تعلقداری اسے، سعودی عرب ننا اسہ جذباتی لگنگ اسے۔ مخدوم شاہ محمود قریشی پارے کہ نن تعلیمی ادارہ غاتے ملانن۔ ہموڑے ہم ایس او پی تیا عملدرآمد ءِ پک کروئی مریک۔ مخدوم شاہ محمود قریشی پارے کہ طبی چاہندار آک وار وار آ دا گڑتی نا درشانیءِ کننگ ءُ کہ موسم سرماٹی کورونا نا ارٹ میکو لہر بننگ کیک۔ ننے رکھی گام گیج آتیا عمل کرسا رہینگوئی مریک تانکہ ڈیوالائی نا مرتکب مفن۔
