کوئٹہ۔ 17 ستمبر (اے پی پی) چیف سیکرٹری بلوچستان کیپٹن (ر) فضیل اصغر پارینے کہ طالب علم آتے کالج و اسکول آتیٹی حکومت نا کنڈآن تروک آ رکھی گام گیج آتیا عملدرآمد المی ءِ ہراڑآن دین انا مون ءِ توننگ اٹ کمک رسینگک۔ داخیال آتا درشانی ءِ او پنچ شنبے نادے آ چندی اسکول آتیٹی ایس او پی تیا عملدرآمد نا چرجوئی ٹی معائنہ ءِ کرسا کرے۔ داوخت آ سیکرٹری ہائیر ایجوکیشن محمد ہاشم غلزئی، سیکرٹری ثانوی تعلیم شیر خان بازئی ئسک ہم اوار ئسر۔ چیف سیکرٹری فضیل اصغر پارے کہ دا مشکل وخت اٹی استاد آتے زیات خواری کروئی مریک داکان بیدس طالب علم آتے ہم زیات وخت تروئی تمک۔ اوپارے کہ دا اسہ مجبوری اس ئس کہ اسکول آتے گڑاس تُو اکن بند کروئی تما ولے کورونا ٹی طالب علم آتا ہرا وخت زیان مسنے اوفتا ازالہ کن دے ونن خواری کروئی مریک۔ اوپارے کہ دورہ نا مسخت حکومت نا کنڈآن تروک آ ایس او پی تیاعملدرآمد ءِ پک کروئی ءِ ولے کنے داڑے برسا بھاز خوشی مس کہ ایس او پی تیا گچین وڑاٹ عملدرآمد مننگ ءِ اوپارے کہ وائرس پورو وڑاٹ چٹتنے و داسکان کیس رپورٹ مننگ ءِ و ننے خیال کننگ نا سخت گرج ءِ چیف سیکرٹری پارے کہ اسکول آتیٹی سفائی ستھرائی وائرس ءِ پین تالان مننگ آن توننگ کیک اوپارے کہ غٹ طالب علم آتے ماسک انا کاریم اٹ اتنگ ءِ المی کروئی مریک و غٹ عملہ و طالب علم آک وار وار آ دوتے سلر وخت اس کہ تعلیمی ادارہ صابون و سینیٹائزر نادستیابی ءِ پک کے۔ اولمہ و باوہ غاتیا ہم زور شاغا کہ او اسکول آ بروک آ تینا چناتا خصوصی خیال ءِ تخر و اِڷ اتون اوار وائرس نا علامت اس پاش مننگ نا حالیت اٹ اسکول آ گدریفپس، اوپارے کہ راجی فاصلہ ءِ برقرار تخنگ آن ہم دا دین آن انسان رکھ مننگ کیک۔
