وزیراعظم نا سلاہکار پارلیمانی امور ڈاکٹر بابر اعوان نا اے پی پی تون گپ وتران

اسلام آباد۔ 17 ستمبر (اے پی پی) وزیراعظم نا سلاہکار پارلیمانی امور ڈاکٹر بابر اعوان پارینے کہ اولیکو وار وزیراعظم عمران خان صدر و وزیراعظم نا آسراتی تے کم کننگ نا بل اس اتنگ ءِ ہرانا رداٹ داسہ اسہ صدر و وزیراعظم اس ہم سرکاری ہنکین تون بیرہ اسہ پین ہنکین اس تخنگ کیرہ۔ داڑآن سرکاری خڑچ آ وی وی آئی پی مننگ نا کلچر چٹک۔ ایف اے ٹی ایف کانود سازی نا سوب آن پاکستان گرے لسٹ آن پیش تمک۔ انٹی منی لانڈرنگ بل انا منظوری آن پد ’’ڈالر گرلز و کش کیری بوائز‘‘ نا کمک اٹ پیشن نا ملک زر آتا فراوانی ءِ توننگ اٹ کمک رسینگک۔ پنچ شنبے نادے آ پارلیمنٹ ہاؤس اٹ اے پی پی تون گپ وتران کرسااوپارے کہ مستین نا صدر و وزیراعظم آک سرکاری رہائش آن بیدس مسہ مسہ شار تیٹی تینا رہائش آتے کیمپ آفس آتا درجہ تسوسر، ہرافتیا کُن و خور، ٹیل فون، بجلی، ترند رفتار انٹرنیٹ، سیکورٹی و ملازم آتا تنخواہ تیا کروڑ آ روپئی خڑچ مسکہ۔ وزیراعظم عمران خان تینا کفایت شعاری نا پالیسی آ عملی گام اس ہرفینے دا آسراتی تے کم کننگ نا فیصلہ کرینے و دابابت بل قومی اسمبلی نا ایجنڈاغاساڑی ءِ۔ وزیراعظم عمران خان اولیکو وزیراعظم ءِ ہرا دا آسراتی تے کم کننگ کن بل اس اتنگ ءِ۔ دا بل انا سوب آن صدر و وزیراعظم نا چندی شار تیٹی بے کچ اُراتے ڈیکلیئر کننگ نا شق چٹک۔ او بیرہ تینا جند انا ہنکین اس تخنگ کیک۔ داڑآن کروڑ آتا بچت مریک۔ اوپارے کہ دا فیصلہ نا سوب آن سرکاری خڑچ آ السی پیسہ غاتیان وی وی آئی پی مننگ نا کلچر چٹک۔ اسہ سوج اسے نا ورندی ٹی اوپارے کہ ایف اے ٹی ایف تاریخ ساز کانود سازی ءِ۔ اگہ دا کانود سازی متوکہ تو پاکستان بلیک لسٹ اٹ بسکہ و ملک ءِ اقتصادی پابندی تتون مون تروئی تما۔ داسہ اومیت ءِ کہ پاکستان گرے لسٹ آن پیش تمک۔ اوپارے کہ کنے دا شرف دوئی ءِ کہ اسلام آباد ہائی کورٹ ہم کنا دور اٹ جوڑ مس و داسہ جج آتا کچ اٹ ودکی نا بل ءِ ہم منظور کرفنگ نا کنے شرف دوئی مسنے۔