حزب اختلاف اسہ وار ولدا پک کرے کہ اونا جند انا فائدہ غاک قومی فائدہ غاتیان ایڑتر ءُ، ڈاکٹر شہباز گل

اسلام آباد۔ 17ستمبر(اے پی پی) وزیراعظم نا خصوصی کمکار سیاسی ابلاغ ڈاکٹر شہبازگل پارینے کہ اپوزیشن فنانشنل ایکشن ٹاسک فورس (ایف اے ٹی ایف) تون وابستہ کانود سازی نا مخ تفی نا بدلہ قومی مفاہمت آرڈیننس(این آراو) خواہسکہ، ولے حکومت احتساب نا عمل آ ہچ ءُ سمجھوتہ اس کپک۔ نجی نیوز چینل تون گپ وتران کرسا اوپارے کہ دا کانود پاکستان کن ایف اے ٹی ایف نا شڑت آتے پورو کنننگ کن المی ئس ولے اپوزیشن جماعت آک تینا جند انا فائدہ غاتیکن دا کانود سازی نا مخ تفی ءِ کتوس۔ اوپارے کہ وزیراعظم عمران خان ملک انا ہر کنڈ آن وڈی خوری نا چٹفنگ کن سنبرینگوک ءِ و او تینا مشن اٹ سرسہب مریک انتئے کہ ریاست نا شونداری و شونہالی کن ہر کہول آن کرپشن نا چٹفنگ المی ءِ۔ اومستی پارے کہ ایف اے ٹی ایف کون آ قومی فائدہ غاتا بل انا منظوری آ اپوزیشن نا رویہ شرمناک ءِ۔ ڈاکٹر شہباز گل پارے کہ ہرامخلوق جمہوریت نا حروف تہجی تیان بے خبر ءُ اوفتے اینو قوم انا مون آ پاش کننگانے۔ شہباز گل پارے کہ حزب اختلاف اسہ وار ولدا دا پک کرے کہ اوڑکن اونا جند انا فائدہ غاک قومی فائدہ غاتیان ایڑتر ءُ۔ شہبازگل پارے کہ اپوزیشن تینا شرف ءِ گوہانے و غٹ پڑتیا بے سہب مسنے۔ اومستی پارے کہ نابود و کرپٹ مخلوق حکومت نا بودی آ سوج کننگ ءُ۔ اوباوری کرفے کہ وڈی خور راہشون تا احساب نا بناءِ کننگانے و زوت آن زوت دا عمل پورو مریک۔