اسلام آباد۔ 17 ستمبر (اے پی پی) وزیر مملکت و چیئرمین زرکاری بورڈ عاطف بخاری پارینے کہ حکومت ملک اٹ زرکاری ، زرگزرانی شونداری، روزگار نا پوسکن ءُ وارخواہی ودی کننگ، صنعتی شونداری و پاکستان اٹ برآمدی پیدوار ءِ مون آ دننگ کون آ ہدف آتا دوئی کننگ کن کوشست کننگ ءِ، براہ راست درملکی زرکاری اتنگ کن 5 بشخ آتے اولیت آتیٹی تخنگانے، اقتصادی زونک اسہ شونہالی و صنعتی پاکستان نا سوب مریرہ، سی پیک نا ارٹ میکو مرحلہ ٹی نجی بشخ مون آ برسا سرکڑدہ ئی کڑد ادا کے۔ پنچ شنبے نادے آ اے پی پی تون خصوصی گپ وتران کرسا اوپارے کہ ہندن ءُ پالیسی جوڑ کننگ ننا اولیت ءِ ہرافتیان براہ راست درملکی زرکاری اتنگ مرے۔ ہراڑکن زرکاری بورڈ پنچ بشخ آتے اولیت کرینے، دا بشخ آتیٹی آئی ٹی انڈسٹری، ہاؤسنگ و تعمیرات، فوڈ پراسیسنگ و کشت وکشار، سیل و سوات و لاجسٹکس اوار ءُ۔ اوپارے کہ پالیسی فریم ورک ءِ نن تینا ویب سائٹ آ ہم اتنگ اُن تانکہ زرکارآتے پاننگ مرے کہ پاکستان ملکی و درملکی زرکارآتے انت آسراتی فراوان کننگ ءِ۔ اوپارے کہ تعلقدار وزارت آتا کمک اٹ نن ساڑی ٹی اِراپالیسی جوڑ کرینن اسہ الیکٹریکل وہیکل پالیسی و موبائل فون تا تیاری نا پالیسی اوار ءُ۔ دا ہڑتوم آتا بابت ننے چینی ایلم بلکن یورپی ملک آتیان ہم است خواہی نظر بننگ ءِ۔ اوپارے کہ بھاز انگا ملٹی نیشنل کمپنی داٹی زرکاری نا خواہندار ءُ۔ اوپارے کہ کاروباراٹ آسانی ودی کننگ کن بھاز کاریم مسنے۔ کوویڈ۔ 19 نا سوب آن ہرا چرجوئی سلیسوسس اوداسہ دُوار بناکرینے ہرانا تازہ انگا درور دادے کہ اسہ آسٹریلیا نا ڈل اس بسوسس ہرا ننا قطبی علاقہ غاتے ہراسس و دا چرجوئی داسہ مون آ کاہک۔ اوپارے کہ براہ راست درملکی زرکاری کن اولی گرج امن و ایمنی نا حالیت مریک و تدوک آ اِراسال اٹی امن و ایمنی نا حالیت آتیٹی بھاز گچینی بسنے۔ اوپارے کہ کوویڈ۔ 19 اسہ بھاز بھلو چیلنج اس ئس، اگہ دا متوکہ تو مچ آ دنیا غان بھلا زرکارآک پاکستان آ بسوسر۔ اوپارے کہ یورپ و امریکہ غان بھلا کمپنیک پبی است خواہی ہلنگ ءُ۔ اوپارے کہ سی پیک نا رداٹ اقتصادی زون تا جوڑ کننگ آن اسہ شونہال و صںعتی پاکستان اس جوڑ مریک۔ دا زون تیٹی ٹیکسٹائل انجینئرنگ، بجلی و الیکٹرانکس، کیمیکل پینٹ، کشت وکشار و فوڈ پروسیسنگ، اسٹیل و پیکجنگ نا بشخ اٹ صنعت جوڑ کننگک۔ پاک چین جغرافیائی خڑکی دا اقتصادی زون تا آباد کاری و تین پہ تینی زرگزرانی فائدہ غاتا دوئی کننگ اٹ کمکار پک مننگ ءِ۔ اوپارے کہ زرکاری بورڈ اقتصادی زون تے غٹ آسراتی تا فراوانی و آسودہی تننگ نا عمل ءِ ترند کرینے۔
