ورلڈ پیشنٹ سیفٹی نا بابت حوال تننگا
اسلام آباد۔ 17 ستمبر (اے پی پی) وزیراعظم نا خصوصی کمکار قومی جان جوڑی ڈاکٹر فیصل سلطان جہانی ادارہ جان جوڑی نا آفس نا دورہ ءِ کرے۔ پنچ شنبے نادے آ وزارت نا ترجمان نا رداٹ پاکستان اٹ جہانی ادارہ جان جوڑی نا نمائندہ ڈاکٹر پلیتھا ماہی پالا اودے بخیر کرے۔ دورہ ٹی ورلڈ پیشنٹ سیفٹی نا بابت خصوصی کمکار جان جوڑی ءِ حوال تننگا۔ حوال اٹی ڈاکٹر پلیتھا ماہی پالا پارے کہ گچین گام گیج و حکمت عملی آن پاکستان کورونا وائرس نا مون ءِ تورینے۔ پاکستان کورونا وائرس نا دین ءِ تالانی آن توننگ نا بابت شاندار کارکڑد نا درشانی ءِ کرینے۔ اوپارے کہ ایلو ملک آتے کورونا وائرس نا دین انا مون ءِ توننگ کن پاکستان نا گام گیج آتا پیروی ءِ کروئی مریک۔ داوخت آ ڈاکٹر فیصل سلطان پارے کہ جہانی ادارہ جان جوڑی نا جان جوڑی نا بشخ اٹ خذمت آک ستاکڑزرہ۔ ہیلتھ ورکرز نا سیفٹی ءِ اولیت ایتنہ۔ اوپارے کہ ہیلتھ ورکرز آتا رکھ اکن حکومت گچین گام گیج کرینے۔ کورونا نا دین ءِ تالانی آن توننگ کن ہیلتھ ورکرآک شاندار خذمت سرتسر۔ اوپارے کہ ہیلتھ ورکر آتا سیفٹی کن غٹ تر وسیلہ غاتے کاریم اٹ اتینہ۔ پاکستان اٹ ہیلتھ ورکرآتا سیفٹی کن خصوصی ٹریننگ نا بست وبند ءِ کننگا۔ ڈاکٹر فیصل سلطان پارے کہ اسہ لکھ ہیلتھ ورکر ءِ پاکستان اٹ خصوصی ٹریننگ تننگا۔
