راولپنڈی۔ 17 ستمبر (اے پی پی) بنجائی وزیر ریلوائی شیخ رشید احمد پارے کہ بھارت پاکستان اٹی سنی شیعہ پھسات نا خواہندار ئس، ملک اٹ خاخر لگفنگ نا سازش پاش مس، و مخلوق ہلنگار، کس اسے نا عقیدہ ءِ سُرفنگپ و تینا عقیدہ ءِ ہلنگپ، ایف اے ٹی ایف نا بابت حکومت نا بھاز بھلو سرسہبی اسے، حکومت زبردست ءُ پول اسے آن گدرینگانے۔ حکومت پک کرینے کہ او سودابازی کتنے، منی لانڈرنگ بل آ سرنڈرکتو۔ داخیال آتا درشانی ءِ او پنچ شنبے نادے آ ریلوائی ہسپتال اٹی 40 کروڑ روپئی نا خڑچ آن پوسکن آ ایمرجنسی بلاک نا بنداو ءِ تخنگ نا دود انا وخت آ صحافی تتون گپ وتران کرساکرے۔ اوپارے کہ اپوزیشن بھاز حساس وڑانا ایف اے ٹی ایف بل انا مخالفت ءِ کرے، کنے اومیت ءِ کہ 20 تاریخ آ اپوزیشن تینے آن بھلو ہچ ءُ فیصلہ اس کپک نئے او کننگ کیک، اگہ اونا سینیٹ نا گچین کاری تیٹی 64 باسک دا کمرہ ٹی مریرہ و دا کمرہ ٹی کارہ تو او 44 مریرہ، کل 38 باسک آتا کم ئس و اوفتے داخہ بھلو رگڑااس لگا کہ ہرابل منظور مروئی الوکہ اودے ہم درو حکومت کرفے، اینو ہرا مخلوق طعنہ تننگ ءُ کہ خواجہ درو کانود ءِ لتاڑنگا تو ہچ ءُ کانود اسے لتاڑنگتو، تقریر ہموکننگ کیک ہراترمیم داخل کرفے، ہرا ترمیم ہی داخل کرفتو، شاہد خاقان عباسی ترمیم داخل کرفیسس او پاننگ کریکہ ولے او پاننگ نا جاگہ غا ایلو ہیت آتیا چکار کرے ، ای نمے باوری کرفیوہ کہ دا 20 ستمبر آ ہم اے پی سی نا کانفرنس ہراارے او بے سہب مریک و بیدس جلسہ و جلوس کننگ آن ہچ اس کپسہ۔ اینو تینا حلقہ ٹی غٹ آن حساس ہیت ءِ پاننگ خواوہ ، داملک اٹی انڈین سازش ئس کہ دا ملک اٹ شیعہ سنی پھساد کرفنگے و ہمو مخلوق گڑاس ہلنگانو ہرا پاکستان اٹ راولپنڈی اسلام آباد نا سنی و شیعہ عالم تے شہید کننگ خوائسرہ۔ تانکہ دا ملک اٹ اسہ خاخر اس لگے، ای تینا غٹ عالم دین تے پاننگ خواوہ کہ پنڈی امن نا شار ءِ نن غٹ اسٹ اُن و ننے نئے کس اسے نا عقیدہ ءِ سُرفوئی ءِ نئے تینا عقیدہ ءِ ہلوئی ءِ، غٹ انا شرف ءِ کینہ۔ مین لائن ون(ایم ایل ون) نا بابت ہریفوک آ اسہ سوج اسے نا ورندی ٹی بنجائی وزیر پارے کہ ایم ایل ون نا ٹینڈر بروک آ منہ دے اٹی لگک و 45 دے اٹی ٹینڈر ملنگک، ایم ایل ون آن اسہ لکھ مخلوق ءِ روزگار ملک، اسہ سوج اسے نا ورندی ٹی شیخ رشید احمد پارے کہ ہچ ءُ ریڈ لائن کراس اس متنے، بلاول و شہباز ہڑتوم آتون کنا ہیت مسنے۔ شہباز شریف نا مورال زرس نزور ئس ولے درو قومی اسمبلی ٹی شہباز شریف دُن ءُ ہچ ءُ غلط ءُ ہیت اس کتو بلکن او اسمبلی و اسپیکر نا ہم پورو شرف ءِ کرے و درو پیپلزپارٹی زیات ایکٹیو ئس ولے شام آ کنا شہباز و بلاول ہڑتوم آتون اوڑدہی مس۔ ان شاء اللہ شین پیش تمک انتئے کہ شین نا پیش تمنگ پک ءِ پنڈی غٹ آن حساس ءِ اسہ کنڈآ جی ایچ کیو ایلو کنڈآ غٹ سفارت خانہ غاک ءُ، راولپنڈی اسلام آباد اٹ کشت وخون نا سازش نا ڈٹ ئس ہراکہ بے سہب مسنے دوبہ دار آک ہلنگانو و داملک اٹ شیعہ سنی سیوت جوڑ ءِ و جوڑ سلک و ہچ کس دادے نسخان تننگ کپک، میاں نواز شریف نا بابت ہریفوک آ سوج انا ورندی ٹی بنجائی وزیر پارے کہ پدی بننگ کن نواز شریف اٹ جیرت اف، لغور ءُ۔ جیل تیٹی مننگ کپسہ، جیل اٹ مچے بھاز آصف زرداری مننگ کیک، ولے دافتے ٹی ہمت اف، دا بشخنداری خواہسا سعودی عرب آ ہنوک ءُ مخلوق اسے ءُ۔
