ہری پور۔ 17 ستمبر (اے پی پی) وزیراعظم عمران خان پارینے کہ ملک ءِ شون ہلوک جوڑ کننگ کن قائد اعظم نا وژن و علامہ اقبال نا تغ انا عملی تعبیر کن کوشست کننگ اُن۔ ملکی شونداری کن سائنس و ٹیکنالوجی نا بشخ اٹ مون آ ہِننگ وخت انا اہم ءُ گرج اسے، خصوصی اقتصادی زون آن ملکی زرگزران ءِ مون آ دننگک، ورناک ننا میرات ءُ، ننا کوشست مریک کہ زیات وسیلہ غاتے تعلیم نا گچینی آ خلین۔ داخیال آتا درشانی ءِ او پنچ شنبے نادے آ ہری پور اٹی پاک آسٹریا فیکوچ شول انسٹیٹیوٹ آف اپلائیڈ سائنسز اینڈ ٹیکنالوجی نا بنائی دود آن تران کرسا کرے۔ وزیراعظم عمران خان پارے کہ انسان نا کاریم کوشست کننگ ءِ، سرسہبی اللہ نا ذات ایتک۔ ننے ہر بشخ اٹ مون آ ہِننگ نا لائخی ارے ننے تینا سوچ ءِ جوان کروئی مریک۔ اوپارے کہ ملک ءِ شون ہلوک جوڑ کننگ کن قائد اعظم نا وژن و علامہ اقبال نا تغ انا عملی تعبیر کن کوشست کننگ اُن۔ اوپارے کہ ننے تینا ذہن تے آجو کرسا شونداری نا کسر ءِ تینا کروئی ءِ۔ وزیراعظم پارے کہ ملکی شونداری کن سائنس و ٹیکنالوجی نا بشخ اٹ مون آ ہِننگ وخت انا اہم ءُ گرج اسے۔ فیس بک ٹویٹر کون آ بھلا کمپنی تا بجٹ ننا سالانہ بجٹ آن ارب آ ڈالر زیات مریک۔ ننے سائنس، ٹیکنالوجی و نالج اکانومی آ چکار کروئی مریک۔ داڑآن ملکی شونداری نا کسر آوار مریک۔ اوپارے کہ سی پیک نا ارٹ میکو مرحلہ بناکرینے۔ خیبر پختونخوا ٹی رشکئی خصوصی اقتصادی زون انا بناءِ کننگانے۔ خصوصی اقتصادی زون آن ملکی زرگزران ءِ مون آ دننگک۔ اوپارے کہ ورناک ننا میرات ءُ۔ انسانی وسیلہ غاتا شونداری کن تعلیم آ خڑچ کروئی مریک۔ اوپارے کہ اقتدار اٹ بننگ نا اولیکو سال زرگزران ءِ سوگو کننگ آ چکار کرین۔ ارٹ میکو سال کورونا نا دین انا حالیت آتون مون تروئی تما ہرانا سوب آن تعلیمی بشخ آ زیات چکار کننگ کتون۔ داسہ قوم ءِ فیصلہ کروئی ءِ کہ ننے تعلیم آ چکار کروئی ءِ۔ اوپارے کہ ایسٹ ریکوری یونٹ وڈی خور آتیان ریکوری کیک۔ دا ہلوک آ زر آتے تعلیم آ خڑچ کننگ کن کانود سازی کینہ۔ اوپارے کہ چین پاکستان اٹ پنچ و آسٹریا مسہ یونیورسٹی جوڑ کرینو۔ خیبر پختونخوا حکومت پاک آسٹریا فیکوچ شول انسٹیٹیوٹ آف اپلائیڈ سائنسز اینڈ ٹیکنالوجی نا جوڑ کننگ کن پبی کمک کرے و مشکل حالیت آتیان پد ہم فنڈ تننگ اٹ کمک کرے۔ وخت پک کیک کہ خیبر پختونخوا حکومت غٹ آن جوان ءُ کاریم اس کرے۔ دا یونیورسٹی نا جوڑ کننگ آ کمک کننگ آ چین و آسٹریا نا منت وار اُٹ۔ داڑآن آخبت اٹ ہڑتوم آ ملک آتا نیام اٹ تعلقداریک پین سوگو مریرہ۔
