وزیر خارجہ مخدوم شاہ محمود قریشی تون پاکستان اٹی یورپی یونین نا سفیر اینڈرولا کامینارانا اوڑدہی، ہڑتوم آ کنڈآتا تعلقداری، کورونا دین انا حالیت آتون اوار تین پہ تینی است خواہی نا باندات آتیا گپ وتران

اسلام آباد۔ 16 ستمبر (اے پی پی) وزیر خارجہ مخدوم شاہ محمود قریشی تون پاکستان اٹی یورپی یونین نا سفیر اینڈرولا کامینارا چارشنبے نادے آ وزارت خارجہ ٹی اوڑدہی کرے۔ اوڑدہی ٹی ہڑتوم آ کنڈآتا تعلقداری، کرونا جہانی دینی حالیت آتون اوار تین پہ تینی است خواہی نا باندات آتیا گپ وتران کننگا۔ وزیر خارجہ کورونا دینی چیلنج تون مون تننگ کن یورپی یونین نا کنڈآن پاکستان نا وخت آ کمکاری آ یورپی یونین نا منت واری ءِ ہرفےو کورونا دین انا زرگزرانی زہم آتون مون تننگ و پدتموک ملک آتے وام تا زرتس آ آسراتی فراوان کننگ نا بابت وزیراعظم عمران خان نا سلاہ نا مخ تفی آ یورپی یونین نا کڑد انا ستاءِ کرے۔ وزیر خارجہ پارے کہ پاکستان کچ اٹنگا وسیلہ غاتیان پد ہم ، کورونا دین انا تالانی ءِ توننگ کن گچین گام گیج کرے۔ پاکستان نئے بیرہ دا جہانی دین انا مون ءِ تورے بلکن زرگزران نا پہیہ ءِ ہم اول سرآن متحرک کرے۔ شاہ محمود قریشی پارے کہ اینو کورونا دین انا مون ءِ توننگ نا چرجوئی ٹی، پاکستان نا سمارٹ لاک ڈاؤن پالیسی نا مچ آ دنیا ٹی ستا ءِ کننگ انگ ءِ۔ وزیر خارجہ اومیت ظاہر کرے کہ یورپی یونین، ایلو ملک آتا شاری تیانبار پاکستانی شاری تے ہم یورپی ملک آتیٹی پترینگ انگ کن اہل گوندک۔ پاکستان و یورپی یونین نا نیام اٹ چندی بشخ آتیٹی کمکاری و تین پہ تینی رابطہ غاتا مون آ دننگ ستاکڑزک۔ وزیر خارجہ یورپی یونین نا سفیر نا چکار، مقبوضہ جموں و کشمیر اٹ برجا انسانی حق انا سنگین خلاف ورزی تا کنڈآن کرفسا پارے کہ یورپی یونین انسانی حق انا داعی مننگ نا ناطہ بھارت آ زور شاغے کہ او مقبوضہ جموں و کشمیر اٹ بیدادی نا چرجوئی ءِ دمدستی وڑاٹ بند کے و بھارتی زندان تیٹی بند بے گناہ کشمیری تے دمدستی یلہ کے۔ وزیر خارجہ اوغان امن عمل، اٹ پاکستان نا خیر خواہی کوشست، بین الاوغان مذاکرات و دا چرجوئی ٹی داتم اسکان مروک آ پیش رفت نا ہم ذکرءِ کرے۔ کڑدہ غاتا چندی بشخ آتیٹی ہڑتوم آ کنڈآتا کمکاری نا مون آ دننگ نا بابت سلابت ءِ برجا تخنگ آ امنا کریر۔