اسلام آباد۔ 16 ستمبر (اے پی پی) بنجائی وزیر حوالکاری وشینکاری سینیٹر شبلی فراز پارینے کہ ملکی زرگزران نا شونداری ٹی مچ آ ملک انا چیمبر آف کامرس اینڈ انڈسٹریز لائف لائن نا حیثیت تخرہ، وزیراعظم عمران خان نا کوویڈ۔ 19 نا توننگ کن سرسہب حکمت عملی نا سوب آن اینو پاکستان اٹ غٹ کاروباری سرجزآک ملنگانو، پوریا گر و کاروباری برادری نا نمائندہ چیمبرز یونیورسٹی تتون رابطہ غاتے گچین کے تانکہ پوسکن آ چین ہم کاروباری اصول و قدر آتے پہہ مننگ کیر۔ او چارشنبےنادے آ اسلام آباد چیمبر اٹ ایکسپورٹ ڈسپلے سینٹر نا بنائی دود آن تران کریکہ۔ بنجائی وزیر حوالکاری و شینکاری سینیٹر شبلی فراز پارے کہ اسلام آباد چیمبر آف کامرس نا کنڈآن عزت افزائی آ منت وار اُٹ۔ اوپارے کہ ساڑی زمانہ ورناچین نا زمانہ ءِ، چیمبر آتے مرے کہ او ورناتے ہم تین تون اوار کیر داڑکن یونیورسٹی تتون لنک اس جوڑ کروئی مریک۔ اوپارے کہ مستین اٹ چیمبر آف کامرس اینڈ انڈسٹریز ءِ ہمو اہمیت ملنگ کتو ہراملوئی ئسک ولے ساڑی حکومت چیمبر آتے پالیسی سازی ٹی اوار دننگ نا عزم کرینے۔ اوپارے کہ کوویڈ۔ 19 نا جہانی دین نا مشکل حالیت آتیان پیش تمانن، داسہ ننے ایس او پی تیا عمل کرسا غٹ رکھی گام گیج آتے اختیار کروئی مریک۔ اوپارے کہ بزنس کمیونٹی پاکستان نا زرگزران ءِ سیبو تس، نن کاروباری برادری کن آسانی ودی کینہ۔ اوپارے کہ زرکار آتا ویل آتے پہہ مریوہ، زرکار آتا توار ءِ مون آ دینہ۔
