اسلام آباد۔ 16 ستمبر (اے پی پی) سلاہکار قومی سلامتی ڈاکٹر معید یوسف پارینے کہ پاکستان زموارءُ ریاست اسے، ڈیہہ ٹی بے چیٹی خواپک، شنگھائی کمکار تنظیم دیوان اٹی پاکستان نا سیاسی نقشہ غا بھارتی اعتراض ءِ مسترد کرے۔ روس پاکستانی نقطہ نظر نا تائید ءِ کرے، بھارتی نمائندہ اجیت دوول ءِ میٹنگ ءِ ہلسا ہنوئی تما۔ سلاہکار قومی سلامتی ڈاکٹر معید یوسف پی ٹی وی آ گپ وتران کرسا پارے کہ پاکستان دیوان اٹی گمری وڑاٹ نقشہ ءِ پیش کرے و آخبت ہم پیش کننگک، جھیڑہ نا بنداو آ بطور زموار ریاست اسے نا اسہ فورم اسے ہم خراب کننگپ۔ شنگھائی کمکار تنظیم دیوان دُن ءُ فورم اس الوکہ ہراڑے نقشہ نا جھیڑہ ءِ اتنگوسس۔ دا اسہ جوانءُ ہیت اسے کہ ہندن ءُ ملک اس ہراڑآن ننا اختلافات ءِ تینے تنیا کننگ ءِ۔ سلاہکار قومی سلامتی نا پاننگ ئس دہشت گردی نا جنگ اٹ شاید ملک اس مرے ہراپاکستان کون کارکڑد نشان ایتے، داسہ مچ آ دنیا امنا کننگ ءِ، اوغان امن مذاکرات اٹ پاکستان تینا کڑد ءِ ادا کرسا کیک۔ اوپارے کہ پاکستان اکنامک سیکورٹی نا ہیت ءِ کیک، پاکستان ریجنل رابطہ غاتا ہیت ءِ کیک، پاکستان نیامی ایشیاغا رسینگ دوئی کننگ والا ءِ، پاکستان سی پیک نا کنڈآ ہِننگ ءِ، روس خواہک رابطہ مرے، نیامی ایشیاخواہک اونا ڈٹ آک مون آ بریر۔ اوپارے کہ پوسکن آ سیاسی نقشہ پاکستان نا حق و کشمیری الس نا است خواہی تا نمائندگی ءِ کیک۔ ایس سی او دیوان اٹی پاکستان نا پوسکن آ سیاسی نقشہ ءِ مسترد کننگ آ اجیت دوول ءِ ڈاکٹر معید یوسف دوٹوک ورندی تس کہ جموں و کشمیر جہانی کہول آ امنا مروک جھیڑہ ئی علاقہ سے۔ جھیڑہ ئی علاقہ غا بھارت ءِ دعویٰ کننگ نا ہچ ءُ کانودی حق اس اف۔
