اسلام آباد۔ 16 ستمبر (اے پی پی) پاکستان تحریک انصاف نا سینیٹر فیصل جاوید پارینے کہ حکومت پولیس اصلاحات درستی راستی کرفنگ و عصمت دری کروک آتیکن سخت سزا تننگ کن فوجداری نظام ءِ پین گچین کننگ کن کوشست کننگ ءِ۔ چارشنبے نادے آ نجی ٹی وی چینل تون گپ وتران کرسا سینیٹر فیصل جاوید پارے کہ حکومت جامع بل اسے آ کاریم کننگ ءِ و اودے قومی اسمبلی ٹی پیش کننگک۔ اوپارے کہ حکومت دا بل ءِ منظور کیک و حزب اختلاف دانا مخ تفی ءِ بایدے کے۔ سینیٹر فیصل جاوید پارے کہ ننے بھس مروک انصاف نا نظام اٹ داوڑ اصلاحات آتا گرج ءِ کہ کم آن کم وخت اٹ سزا تننگے و زہمی کڑدہ و ڈوہدار تا نیام اٹ ہچ ءُ مفاہمت اس مف۔ سینیٹر فیصل جاوید پارے کہ حکومت ملک اٹی جنسی بیدادی تے توننگ کن سخت آن سخت سزا درستی راستی کرفک۔ اوپارے کہ نن سزا ءِ سخت کننگ و مقدمہ گاتے ایسر اسکان سرکننگ کن کانود سازی ٹی گچینی اتینہ و عصمت دری نا مخلوق ءِ پاہو تننگ کن امنائی سلاہ نا گرج ءِ۔ سینیٹر فیصل جاوید پارے کہ ڈوہدار بندغ آتا مخ تفی ءِ کروک آتے ہم مثالی ءُ سزا تننگے، ننے ہمو زالبول و چناتیکن انصاف ءِ پک کننگ نا ءِ ہرافتے تون بیدادی مسنے۔ سینیٹر فیصل جاوید اومیت ظاہر کرے کہ حکومت ترمیم تیار کننگ ءِ و مچ آ قوم ننتون تفک۔ اوپارے کہ بھاز انگا واقعہ غاتا حوال ملپک ولے ننے دا پک کروئی ءِ کہ عصمت دری نا ڈوہ اٹی اوار چناو زالبول آتے دمدستی انصاف فراوان کننگے۔ او سخت تنقید کرے کہ پنجاب اٹ مسلم لیگ (ن) نا حکومت پولیس محکمہ ءِ مدام تینا جند انا فائدہ غاتیکن استعمال کرے و تھانہ نظام ءِ برباد کرے۔
