وزیر مملکت پارلیمانی امور نا ایوان بالا ٹی جہانزیب جمالدینی نا سوج انا ورندی
اسلام آباد۔ 16 ستمبر (اے پی پی) وزیر مملکت پارلیمانی امور علی محمد خان پارینے کہ سخت سزانافذ کننگ تون اوار اوار فحاشی و بے حیائی نا توننگ ہم المی ءِ، عالم دینک بے کسری ءِ توننگ کن حکومت نا کوشست آتون بایدے تفر۔ چارشنبے نادے آ ایوان بالا ٹی وقفہ سوج آتیٹی جہانزیب جمالدینی نا سوج انا ورندی ٹی وزیر پارلیمانی امور علی محمد خان پارے کہ ڈوہدار تے سرعام سزا تننگ نا مخ تف اُٹ ولے بیرہ سزا تیان گچینی بفک، پولیس و انصاف نا نظام اٹ گچینی اتنگ نا گرج ءِ۔ چیئرمین پارے کہ نظام ءِ گچین کننگ کن سٹڈیز یا سروے کرفر۔ علی محمد خان پارے کہ سائنٹفک وڑوڈول ءِ اختیار کننگ و کانود ءِ سیاسی وابستگی تیان ایڑ مرسا گچین کروئی مریک۔ اسہ حکومت اس ہم عالم دین تا کمک آن بیدس راج ءِ گچین کننگ کپک، وزیراعظم اسلامی سزاتا ہیت ءِ وار وار آ کننگ ءِ، نن دا سمجھنہ کہ سزاک اسلام نا رداٹ سخت آن سخت مریر، فحاشی نا توننگ ہم المی ءِ، پیمرا ڈرامہ غاتیٹی فحاشی و بے حیائی نا برخلاف گام گیج کننگ ءِ، حکومت بے راہ روی نا توننگ نا خواہندار ءِ، منبر و مسیت ہم حکومت نا داکوشست آتیٹی تفر۔ حکومت چناتا اسہ ہندن ءُ تربیت اس خواہک ہراکہ ریاست مدینہ ٹی اہتمام کننگاکہ۔
