اسلام آباد۔ 16 ستمبر (اے پی پی) ڈپٹی چیئرمین سینیٹ سلیم مانڈوی والا پارینے کہ جمہوریت ننا ویل آتا ایسری ءِ و ننے جمہوریت نا تسلسل، بقاء سوگوی و جمہوری رویہ غاتا مون آ دننگ کن اواری اٹ کاریم کروئی مریک۔ اوداخیال آتا درشانی ءِ بھٹو فاؤنڈیشن نا کنڈآن اسہ سیمینار اسے آن شہید ذوالفقار علی بھٹو انسٹیٹیوٹ سائنس اینڈ ٹیکنالوجی اسلام آباد اٹی جمہوریت نا جہانی دے انا بابت تران کرسا کرے۔ اوپارے کہ شونداری نا دوئی کننگ کن پارلیمان، عدلیہ و حکومت ءِ اواری اٹ کاریم کننگ نا گرج ءِ۔ ڈپٹی چیئرمین سینیٹ پارے کہ جمہوریت پدریسہ اسہ ارتقائی ءُ عمل اسے دا چرجوئی ٹی جہانی آزموندہ غاتیان ہم بایدے فائدہ ہرفنگے تانکہ ملک اٹ جمہوریت نا ماس تے پین سوگو کننگ مرے۔ ڈپٹی چیئرمین سینیٹ پارے کہ مستین نا غیر جمہوری نیام تمنگ جمہوری عمل نا کسر اٹ اڑاند شاغا ولے جمہوریت پسند سوچ داڑآن پین سوگو مس۔ اوپارے کہ جمہوریت زند انا اسہ وڑ اسے و دا زند انا وڑ ءِ تینا کننگ کن ننےتینا گچین کڑد ءِ ادا کروئی مریک۔ اوپارے کہ پاکستان اسہ جمہوریت پسندانہ سوچ انا رداٹ جوڑ مس و اینو پاکستان دنیا نا غٹ آن بھلا جمہوری ریاست ءِ۔ پاکستان نا ادارہ پارلیمانی خذمت آتیٹی اڈ ہلوک اسہ پین سیمینار اسے آن تران کرسا ڈپٹی چیئرمین سینیٹ پارے کہ امن، شونداری و جمہوریت نا اسہ ایلو ٹی خڑکی تعلق ءِ و جمہوریت ننا ویل آتا ایسری ءِ۔ اوپارے کہ جمہوریت نا سوب سگ و امن ءِ مون آ دننگک و ڈائیلاگ نا کمک اٹ ویل آتا ایسراس کشنگک۔ ڈپٹی چیئرمین سینیٹ سیمینار ءِبھاز اہم گوندا و پارے کہ داوڑنا کوشسست آتیان قومی کہول آ جمہوری رویہ غاتے مون آ دننگ اٹ کمک رسینگک۔
