اسلام آباد۔ 16 ستمبر (اے پی پی) وزیراعظم نا سلاہکار پارلیمانی امور ڈاکٹر بابر اعوان پارینے کہ ایوان نا کارروائی ءِ چلیفنگ اٹ آئین و قاعدہ نا اسُل خلاف ورزی متنے، اوکان پد ہم اپوزیشن اگہ دا باندات ءِ عدالت اٹ دننگ خواہک تو دے ولے عدالت آک ہرافتے بٹنگ انگ ءُ اوفتے ہم عدالت آتا مون آ پیش کننگے۔ چارشنبے نادے آ قومی اسمبلی ٹی وزیراعظم نا سلاہکار پارلیمانی امور ڈاکٹر بابر اعوان پارے کہ مچ آ دنیا ٹی پارلیمنٹ نا کارروائی قاعدہ نا رداٹ چلیفنگک۔ داقاعدہ غاتے آئین نا رداٹ جوڑ کننگک۔ او آئین نا آرٹیکل 55 نا حوالہ ءِ ترسا پارے کہ اگہ ایوان اٹ کورم مف تو اسپیکر تون اِراوڑوڈول مریرہ اسٹ او دیوان نا کارروائی ءِ ملتوی یا معطل کننگ کیک۔ اوپارے کہ آئین اٹ اسہ گھنٹہ غان زیات وخت مقرر اف۔ داایوان کس اسے نا جند انا است خواہی یا سیاست نا گواچی مف۔ اوپارے کہ قاعدہ و ضابطہ نا قاعدہ پنچ انا حوالہ ءِ ترسا پارے کہ اگہ ایوان اٹ کورم مف تو اسپیکر ءِ پنچ منٹ اسکان گھنٹی خلنگ نا اختیار مریک۔ اسپیکر دیوان نا کارروائی ءِ معطل ہم کننگ کیک یا بروک آدے اسکان ملتوی ہم کننگ کیک۔ اوپارے کہ اینو نا دیوان اٹی جاگہ اس ہم قاعدہ نا خلاف ورزی متنے۔ اوقاعدہ 288 نا حوالہ ءِ ترسا پارے کہ اسپیکر نا مرضی اٹ ایوان نا اسہ باسک اس ہم قاعدہ ءِ معطل کننگ نا تحریک پیش کننگ کیک۔ اوپارے کہ اپوزیشن نا کنڈآن داپاننگانے کہ او دا باندات آ عدالت آ کاہک۔ ای اوفتے پاوہ کہ ہرافتے عدالت آک بٹنگ انگ ءُ اوفتے ہم دیر۔
