اسلام آباد۔ 15 ستمبر (اے پی پی) چیئرمین سینیٹ محمد صادق سنجرانی جہانی یوم جمہوریت نا وخت آ تینا کلہو اٹی پارینے کہ جمہوری نظام آجوئی سلاہ درشانی، احتسابی عمل و انسانی حق انا فراوانی ءِ پک کیک۔ جمہوری نظام نا وڑانا رداٹ ملک انا غٹ سیاسی جماعت آک شونداری و شونہالی و السی خذمت اٹ زیات آن زیات بشخ ہلیرہ ہرا سوگو امن و شونداری نا سوب مریک۔ جمہوریت کانود نا حکمرانی و بنداوی انسانی حق انا وت ءِ۔ چیئرمین سینیٹ پارے کہ 15 ستمبر جہانی یوم جمہوریت نا وڑاٹ مچ آ دنیا ٹی اڈتننگک و دادے ءِ اڈتننگ نا مسخت ہندادے کہ نن جمہوریت نا رکھ و مون آ دننگ نا خاطر تینا عزم انا تجدید ءِ کین۔ اوپارے کہ 2007ء ٹی اقوام متحدہ نا جنرل اسمبلی نا قرارداد اٹی 15 ستمبر ءِ جہانی یوم جمہوریت نا وڑاٹ اڈتننگ نا فیصلہ ءِ کننگا و 2008ء آن دادے آ مچ آ دنیا ٹی یوم جمہوریت نا دے اڈتننگک۔ پارلیمنٹ نا کڑد انا بارواٹ گپ وتران کرسا محمد صادق سنجرانی پارے کہ اینو، ننا پارلیمنٹ السی رسینگ، صنفی و ورناتے اوار کننگ نا چندی نقطہ نظر نا سوب آن بھاز زیات شفاف سلوک ءِ۔ خاص وڑاٹ ایوان بالا جمہوریت و پارلیمنٹ ءِ مون تروک چیلنج آتون مون تس و شاندار جمہوریت نا پوسکن ءُ درور ہلا۔ جمہوریت نا تسلسل نا علامت کن ایوان بالا ایلو سوچ و فکر ءِ تالان کرے و کانود سازی کن ملک انا غٹ اکائی تا توار جوڑ مس۔ ایوان بالا قومی یکجہتی، صوبہ غاتا نیام اٹ ہم آہنگی ءِ مون آ دننگ و بنجائی یونٹ آتے بریبری نمائندگی تننگ نا نازرک توازن ءِ برقرار تخسا جمہوریت ءِ سوگو کننگ نا مزل ءِ طے کرینے۔ ہراڑآن بنجا و جمہوریت ہڑتوم آتے سوگوی رسینگانے۔ محمد صادق سنجرانی پارے کہ 15 ستمبر بھاز اہم ءُ موقع اسے ہراٹی نن تینا شونداری و جمہوری اصلاح نا عمل ءِ مون آ دننگ نا جاچ ءِ ہلسا آخبت کن لائحہ عمل اس پک کننگ کینہ۔ دادے جمہوریت نا بارواٹ السی شعور تالان کننگ و مخلوق ءِ راجی آسراتی، است خواہی و گچین زند انا وڑ ودی کننگ نا بابت ہم اہم ءُ دے اسے۔
