اسلام آباد۔ 15 ستمبر (اے پی پی) صدر مملکت ڈاکٹر عارف علوی پارینے کہ ساڑی چیلنج آتا رداٹ تعلیم نا فراوانی آ چکار کننگے، سائنس اینڈ ٹیکنالوجی نا بشخ اٹی شونداری وخت انا اہم ءُ گرج اسے، حقدار طالب علم آتے بڑزکو تعلیم نا وارخواہی فراوان کننگے۔ داخیال آتا درشانی ءِ او سے شنبے نادے آ غلام اسحاق خان انسٹیٹیوٹ آف انجینئرنگ، سائنس اینڈ ٹیکنالوجی نا کانووکیشن آن تران کرسا کرے۔ صدر مملکت پارے کہ بڑزکو کارکڑد نشان تروک آ طالب علم آتے مبارکباد پیش کیوہ۔ طالب علم آتا سرسہبی ٹی استاد و لمہ و باوہ نا کلیدی ءُ کڑد اس مریک۔ اوپارے کہ فارغ التحصیل مروک آ طالب علم آتے سرسہبی اٹ تینا ہند ءِ جوڑ کروئی ءِ۔ ٹیکنالوجی نا شونداری جم حالیت آتے بدل کرینے۔ شونداری عمل اٹ اخلاقیات و اصول آتا دامن ءِ ہلیپیرے۔ سائنس اینڈ ٹیکنالوجی نا بشخ اٹی شونداری وخت انا گرج ءِ۔ کورونا زرگزرانی و راجی زند انا وڑ ءِ بدل کرے۔ صدر مملکت پارے کہ ساڑی چیلنج آتا رداٹ تعلیم نا فراوانی آ چکار کننگ نا گرج ءِ۔ نن تینا طالب علم آتے مارکیٹ نا گرج انا رداٹ بایدے تعلیم ایتن۔ حقدار طالب علم آتے بڑزکو تعلیم کن وارخواہی تا فراوانی بھاز المی ءِ دارداٹ حکومت نا کنڈآن احساس پروگرام نا رداٹ وظیفہ نا فراوانی اہم ءُ گام گیج اسے۔ مصنوعی ذہانت نا بشخ ترندی اٹ شون ہلنگ ءِ۔ اوپارے کہ فلاحی ریاست اٹ احساس و رحم غٹ آن اہم ءُ سوب اس مریک۔
