اسلام آباد۔ 15 ستمبر (اے پی پی) باہوٹ آتا جہانی ادارہ (یو این ایچ سی آر) پاکستان مچ آ ملک اٹی کوویڈ۔ 19 نا لاک ڈاؤن آن زہمی مروک آ حقدار اوغان باہوٹ آتیٹی احساس ایمرجنسی کیش پروگرام آنبار مالی امداد نا پروگرام پاکستان پوسٹ انا کمک اٹ برجاتخانے دا چرجوئی ٹی ہر چار آ صوبہ و اسلام آباد اٹی رجسٹرڈ اوغان باہوٹ آتا 30 ہزار آن زیات حقدار خاہوت آتیٹی امداد بشخنگانے۔ سے شنبے نادے آ یو این ایچ سی آر نا ترجمان قیصر خان اے پی پی ءِ پارے کہ حکومت پاکستان وزارت سیفران داخلہ و خارجہ نا کمک اٹ پاکستان اٹ رہینگوک رجسٹرڈ اوغان باہوٹ ہرا کوویڈ۔ 19 نا لاک ڈاؤن نا سوب آن بھاز بے وڑ زہمی مسنو اوفتے یو این ایچ سی آر پاکستان، پاکستان پوسٹ انا کمک اٹ 12 ہزار روپئی فی خاہوت ءِ تننگ انگ ءِ تانکہ او تینا ضرورت نا کنوئی آ گڑاتے ہلنگ کیر۔ اوپارے کہ دا پروگرام ہندن ءِ ہراوڑ حکومت پاکستان نا کنڈآن احساس ایمرجنسی پروگرام نا رداٹ حقدار مخلوق اٹ 12 ہزار روپئی تننگ انگ ءِ۔ اوپارے کہ بلوچستان نا شار کوئٹہ، صوبہ خیبر پختونخوا، اسلام آباد اٹی ہم اوغان باہوٹ آتا حقدار رجسٹرڈ خاہوت آتیٹی پاکستان پوسٹ انا کمک اٹ 12 ہزار روپئی بشخنگ انگ ءِ ہرا اولیکو مرحلہ ٹی 36 ہزار اوغان باہوٹ آتا خاہوت آتیٹی بشخنگ انگ ءِ۔ اوپارے کہ اوغان باہوٹ آتا رجسٹرڈ 30 ہزار خاہوت آتیٹی 12 ہزار فی خاہوت بشخنگانے۔
