بیست ءُ چار گھنٹہ ٹی کوویڈ۔ 19 نا 404 کیس مسر، 6 ناجوڑ مچ آ ملک انا ہسپتال آتیٹی دین انا سوب آن زوال کریر، کورونا نا ایکٹیو کیس آتا کچ 5 ہزار 774 مس، این سی او سی

اسلام آباد۔ 15 ستمبر (اے پی پی) نیشنل کمانڈ اینڈ آپریشن سینٹر(این سی او سی) کورونا دین انا بابت تازہ انگا حساب وکتاب ءِ جاری کرینے۔ سے شنبے نادے آ این سی او سی آن جاری کروک حساب وکتاب نا رداٹ تدوک آ 24 گھنٹہ ٹی کورونا نا 404 ناجوڑ آتا ٹیسٹ مثبت بس وخت اس کہ تدوک آ 24 گھنٹہ ٹی 6 ناجوڑ مچ آ ملک انا ہسپتال آتیٹی دین انا سوب آن زوال کریر۔ تدوک آ 24 گھنٹہ ٹی ملک اٹی جم وڑاٹ کورونانا ایکٹیو کیس آتا کچ 5 ہزار 774 مس۔ تدوک آ 24 گھنٹہ ٹی 27 ہزار 277 کورونا نا ٹیسٹ کننگا ہرافتیان سندھ اٹی 12 ہزار 93، پنجاب اٹی 9 ہزار 98، خیبر پختونخوا ٹی 2 ہزار 145، اسلام آباد اٹی 3 ہزار 52، بلوچستان اٹی 227، گلگت بلتستان اٹی 385و آزاد کشمیر اٹی 277 ٹیسٹ کننگا۔ داتم اسکان مچ آ ملک اٹی کورونا غان دراخ جوڑ مروک آتا کچ 2 لکھ 90 ہزار 261 مسنے۔ آزاد کشمیر، گلگت بلتستان و بلوچستان اٹی اسہ ہم کورونا نا ناجوڑ اس وینٹی لیٹر آ اف وخت اس کہ مچ آ ملک اٹی کورونا کن جتا کروک 1 ہزار 912 وینٹی لیٹر آتیا کورونا نا92 ناجوڑ ءُ۔ داتم اسکان مچ آ ملک اٹی کورونا نا ناجوڑ آتاجم کچ 3 لکھ 2 ہزار 424 ءِ ہرافتیان آزاد کشمیر اٹی 2 ہزار 426، بلوچستان اٹی 13 ہزار 621، گلگت بلتستان اٹی 3 ہزار 269، اسلام آباد اٹی 15 ہزار 962، خیبر پختونخوا ٹی 37 ہزار 79، پنجاب اٹی 97 ہزار 817و سندھ اٹی 1 لکھ 32 ہزار 250 ناجوڑ ءُ۔ مچ آ ملک اٹی کورونا غان زوال کروک آتا کچ 6 ہزار 389 ءِ ہرافتیان سندھ اٹی 2 ہزار 445، پنجاب اٹی 2 ہزار 220 مرک مس و تدوک آ 24 گھنٹہ ٹی 3 بندغ زوال کریر۔ خیبر پختونخوا ٹی 1 ہزار 257، اسلام آباد اٹی کل 178، بلوچستان اٹی 145، گلگت بلتستان اٹی 78 مرک مس و تدوک آ 24 گھنٹہ ٹی 2 بندغ زوال کریر وخت اس کہ آزاد کشمیر اٹی دا دین آن 66 مرک مسنے و تدوک آ 24 گھنٹہ ٹی اسہ بندغ اس زوال کرے۔ داتم اسکان مچ آ ملک اٹی 29 لکھ 95 ہزار 890 کورونا نا ٹیسٹ کننگا۔ مچ آ ملک اٹی کورونا نا درمان کن جتا 735 ہسپتال آتیٹی 1 ہزار 9 ناجوڑ درمان مننگ ءُ۔ تعلیمی ادارہ غاتے ملنگ نا مرحلہ وار بنادوشنبے آن مس۔ این سی او سی تعلیمی ادارہ غاتے ملنگ آن مست جان جوڑی نا راہشون اصول و پروٹوکول مہالو آن جاری کرینے، پروٹوکول آ عملدرآمد ءِ پک کننگ کن خصوصی مانیٹرنگ میکنزم اس غٹ اسٹیک ہولڈر آتا تین پہ تینی رضامندی اٹ تیار کننگانے۔ صوبائی و ڈسٹرکٹ انتظامیہ نا چاروکی ءِ کروک آ ٹیمک مچ آ پاکستان اٹی جان جوڑی نا ایس او پی تیا عملدرآمد ءِ پک کیرہ۔ پروٹوکول نا خلاف ورزی نا حالیت اٹ صوبائی و ضلعی انتظامیہ ءِ دا اختیار تننگانے کہ او ادارہ ءِ بند یا جرمانہ کے۔ ماسک بیننگ داتسکان کہ لس پچ انا ماسک مرے و راجی فاصلہ ءِ برقرار تخنگ، دا مشکل وخت طالب علم آتا جان جوڑی و رکھ ءِ پک کننگ کن غٹ آن اہم ءُ گام گیج اسے۔