اسلام آباد۔ 14 ستمبر (اے پی پی) چیف جسٹس آف پاکستان جسٹس گلزار احمد پارینے کہ ہراتم اسکان جج آک آجو، وتواجہ و پیشن نا دباؤآن ایڑتر مفسہ ہمووخت اسکان انصاف ممکن اف، آئین وکانود نا رداٹ اسٹ اسے ہم عدلیہ نا آجوئی ءِ دَب تننگ نا موکل اف۔ ہر جج تینا عہدہ نا سوغند ہلوک مریک ہرانا سوب او انصاف کننگ نا پابند ءِ۔ دوشنبے نادے آ داہیت ءِ چیف جسٹس آف پاکستان داڑے سپریم کورٹ نا پوسکن آ عدالتی سال 2020-21نا بنانابابت اڈ ہلوک آ دود آن تران اٹی پارے۔ دود اٹی شرفمند آ جج صاحب آک، بار انا نمائندہ غاک و وکیل آک بھلو کچ اسے ٹی ساڑی ئسر۔ چیف جسٹس گلزار احمد پارے کہ جج مننگ بیرہ شرفمندی اس اف بلکن جج آ انصاف تننگ نا بھلو زمواری اسے، ہر جج تینا عہدہ نا سوغند ہلوک مریک ہرانا سوب او انصاف کننگ نا پابند ءِ، آئین نا دیباچہ عدلیہ نا رکھ انا ضمانت ایتک۔ اوپارے کہ نظام انصاف اٹ نن ہراہند آمرین اوڑکن بھلو سفر اس سلوک ءِ، فراوانی انصاف نئے بیرہ ہر مہذب راج انا بنداو مریک بلکن دا اسلام نا ہمو بنداوی اصول آتیان اسٹ ءِ ہرانا تصور ءِ قرآن و سنت تسنو، انصاف بیرہ حق انا تعین ءِ کننگ نا پن اف بلکن مساوات قائم کننگ نا پن ءِ، کانود نا نظر اٹ الس نا حق جنس، مذہب و نسل آن ایڑترمریک، ای باوری کرفیوہ کہ آئین نا بالادستی کن سپریم کورٹ ہروڑنا گام گیج کیک۔ اوپارے کہ وکیل آک کوروناوائرس اٹی بھاز ہمت و جیرت اٹ تینا فرض ءِ پورو کریر، کوروناوائرس اٹی رکھی گام گیج آتون عدالت عظمیٰ تینا کسبی روایت آتے برقرار تخا۔ اوپارے کہ پوسکن آ عدالتی سال انا دود ننا تدوک آ سال انا کارکڑد ءِ ہُننگ و پوسکن آ ہدف آتا دوئی کننگ کن پوسکن ءُ پالیسی اس جوڑ کننگ نا موقع فراوان کیک، ہراتم ای چیف جسٹس مسٹ تو محسوس کریٹ کہ پاکستانی عدالتی نظام اٹ زیر التوا مقدمہ غاک بھاز زیات ءُ ، عدالت عظمیٰ ٹی زیر التواء مقدمہ غاتیا اہم فیصلہ کریٹ، انصاف نا وخت آ فراوانی کن ای کورٹ نظام نا کمک اٹ ہم مقدمہ غاتا سماعت ءِ کننگا، مقدمہ غاتا زیر التوا مننگ نا سوب بے المی التواءِ۔ چیف جسٹس گلزار احمد پارے کہ سپریم کورٹ نا انسانی حق سیل اٹی پوسکن ءُ درخواست جمع مننگ ءِ ولے متکن آ درخواست آتیا سماعت ہم کننگ انگ ءِ۔ داوخت آ چیف جسٹس آف پاکستان پوسکن آ عدالتی سال اکن پالیسی نا پڑو ءِ ہم کرے۔ داوخت آ اٹارنی جنرل آف پاکستان خالد جاوید خان تینا تران اٹی پارے کہ پوسکن آ عدالتی سال اٹی ننے تینا اولیت آتا تعین ءِ کروئی مریک، انصاف اٹ تاخیر بنداوی ویل ءِ، انصاف اٹ تاخیر نا ویل آ دمدستی چکار کننگ نا گرج ءِ۔
