اسلام آباد۔ 27 اگست (اے پی پی) وزیر خارجہ مخدوم شاہ محمود قریشی پارینے کہ پاکستان نا کوشست ءِ کہ انٹرااوغان ڈائیلاگ ءِ زوت مون آ دننگے۔ اوغان امن عمل ءِ مون آ دننگ نا بابت اسہ بیان اسے ٹی وزیر خارجہ پارے کہ اوغان طالبان نمائندہ ڈل اتون اوڑدہی بھاز جوان مس۔ نن داڑآامنا ئسن کہ اوغانستان نا ویل انا سوگو ایسر’’سیاسی ایسر‘‘ ءِ ہرا مذاکرات نا کمک اٹ مننگ کیک۔ اوپارے کہ اوغانستان اٹی امن اگہ زورانا زی آ مسکہ تو 41 سال انا وخت، چنکو وخت اس الوکہ ولے داوڑمننگ کتو۔ اوغانستان اٹی امن کن مذاکرات نا کسر ءِ ہلنگ نا بابت اینو وزیراعظم عمران خان نا نکتہ نظر نا تائید ءِ امریکہ، روس چین و ڈیہہ نا اہم ملک آک ہم کننگ ءُ۔ وزیر خارجہ پارے کہ ننا گپ وتران دوحہ ٹی مروک آ امن معاہدہ غا عملدرآمد نا بابت ہم مسنے۔ اوغان ڈل دوحہ امن معاہدہ غا عملدرآمدنا چرجوئی ٹی مون تروک مشکل آتیان ہم معلومدار کرے۔ دوحہ امن معاہدہ غا عملدرآمد نا چرجوئی ٹی پیش رفت ہم مسنے۔ لویہ جرگہ نا اڈتننگ، دابابت مثبت پیش رفت ءِ۔ وزیر خارجہ پارے کہ دُن کہ نمے سماءِ کہ وزیراعظم عمران خان جناب عبداللہ عبداللہ تون ٹیل فون آ رابطہ کرینےو اودے پاکستان نا دورہ ءِ کننگ نا سلہ ہم خلکونے ہرادے او امنا کرینے۔ پاکستان نا کوشست ءِ کہ انٹرا اوغان ڈائیلاگ ءِ زوت مون آ دننگے۔
