اسلام آباد۔ 27 اگست (اے پی پی) بنجائی وزیر کانود و انصاف بیرسٹر فروغ نسیم پارینے کہ اینٹی منی لانڈرنگ کانود جوڑ کننگ ایف اے ٹی ایف نا گرج ءِ۔ اواسہ انٹرویو اسے ٹی تینا خیال آتا درشانی ءِ کرسا پارے کہ فنانشل ایکشن ٹاسک فورس (ایف اے ٹی ایف) نا جوڑ کروک آب آ پورو سلنگ کن اینٹی منی لانڈرنگ کانود جوڑ کننگ نا گرج ءِ۔ وزیر کانود مستی پارے کہ داتجویز کننگ غلط ءِ کہ منی لانڈرنگ نا باندات آتیٹی بیدس وارنٹ دزگیری ایف اے ٹی ایف نا گرج اف۔ ضابطہ فوجداری نا وڑوڈول (سی آرپی سی) نا رداٹ چندی ڈوہ ءُ ہرافتیکن وارنٹ آن بیدس دزگیرکننگ مریک۔ بیدس وارنٹ دزگیری آئین نا خلاف ورزی اف۔ اوپارے کہ گڑاس قابل شناخت ڈوہ ءُ ہرافتے ٹی پولیس دوبہ دار ءِ بیدس وارنٹ دزگیر کننگ کیک۔ کینیڈا و امریکہ کون آ ملک آتیٹی ہم گڑاس باندات آتیٹی جاست وپاست کن عدالت ءِ دوبہ دار نا دزگیری کن موکل طلب کروئی مریک۔ اومستی پارے کہ الس ءِ ریفنگ انگ ءِ کہ سینیٹ اٹ ہرابل ءِ پیش کننگ انگ ءِ او ایف اے ٹی ایف تون منسلک اف یا ایف اے ٹی ایف نا گرج اف۔ اوپارے کہ داوڑنا ہچ ءُ شق اس اف ہرا ایف اے ٹی ایف نا پک کروک آب آ پورو سلپ۔ اسہ درملکی کنسلٹنٹ نا رپورٹ و اوڑتون اوار ایف اے ٹی ایف نا رپورٹ آتے مون آ تخسا داکانود ءِ جوڑ کننگ آ کاریم کننگا۔ اوپارے کہ سینیٹ نا کنڈآن ایف اے ٹی ایف نا بابت اِرابل ءِ مسترد کننگ بدبختی نا ہیت اسے و داہیت انا گمان ءِ کہ دا بل آتے پارلیمنٹ نا اسیجائی دیوان اٹ پیش کننگک۔ ڈاکٹر فروغ نسیم پارے کہ او ایوان اٹ پیدوار وڑٹ وضاحت کرے کہ قومی احتساب بیورو(نیب) اے ایم ایل اے نا رداٹ اسہ جاست وپاستی ایجنسی اس رہینگانے ہرا 2010 ء ٹی نافذ کننگاسس و ساڑی حکومت نا داڑتون ہچ ءُ لین دین اس الوکہ۔ اینٹی منی لانڈرنگ کانود سازی ٹی نیب ءِ تفتیشی ایجنسی اسے نا حیثیت اٹ اینک کننگ مفک۔ اومستی پارے کہ نیب کانود اٹ ترمیم نا درگہ غاک ملوک ءُ ولے داہیت انا خیال ءِ تخنگک کہ داڑآن احتساب نا عمل زہمی مف۔
