اسلام آباد۔ 21 اگست (اے پی پی) وزیراعظم نا سلاہکار خزانہ و محصولات ڈاکٹر عبدالحفیظ شیخ پارینے کہ پاکستان نا الس نا راجی آسراتی و شونداری حکومتی اصلاحات نا پروگرام نا اہم مسخت و ہدف ءِ۔ ادارہ جاتی اصلاحات آتا عمل برجاءِ، اسٹیٹ بینک، ایس ای سی پی و مسابقتی کمیشن آجووڑاٹ کاریم کننگ ءُ، اصلاحات نا پروگرام نا اسہ پین عنصر اس ادارہ جاتی اصلاحات نا عمل اٹ نجی بشخ ءِ اوار کننگ نا ءِ، ملکی تاریخ اٹی دا یکتا موقع ءِ کہ اسہ ہندن ءُ لیڈر اس ارے ہرا میرٹ آ کاریم کننگ ءِ۔ داہیت ءِ او کراچی کونسل آن فارن ریلیشنز نا کنڈآن ’’حقیقت پسندانہ اصلاحات نا کمک اٹ اقتصادی سوگوی‘‘ نا سرحال آ ویبینار آن تران کرسا پارے۔ ڈاکٹر عبدالحفیظ شیخ پارے کہ ہراتم ساڑی آ حکومت بس تو تہہ و پیشن نا نسخان زیات ئس، برآمد آتیٹی ودکی تدوک آ پنچ سال منفی ٹی ئسر، ڈالر نا مصنوعی قدر اکن ڈالر ءِ کاریم اٹ اتنگا۔ کرنٹ اکاؤنٹ نسخان 20 ارب ڈالر ئس۔ مالی نسخان ہم زیات ئس۔ ساڑی حکومت مشکل فیصلہ کرے۔ اصلاحات نا پروگرام نا مخ تفی ءِ کننگ کن جہانی برادری و جہانی مالیاتی ادارہ کون آ آئی ایم ایف آن کمک ہلنگا۔ ایشیائی شونداری بینک، جہانی بینک و کثیر الجہتی و ہڑتوم آ کنڈآتا بست وبند آتا رداٹ ودکی بجٹ کمک دوئی کننگا۔ داڑتون اوار اوار مشکل فیصلہ کننگا ہرافتے ٹی مارکیٹ نا حقی حالیت آتا بنداو آ ڈالر نا قدر انا تعین نا فیصلہ ہم اوار ئس۔ اوپارے کہ تاریخی وڑاٹ پاکستان برآمد آتیٹی ودکی کننگ اٹ بے سہب مسنے۔ حکومت درآمد آتا آجو بہاؤ نا جاگہ غا برآمد آتیٹی ودکی کننگ آ تینا چکار ءِ کرے داڑکن پوریا گر و کاروباری برادری کن ترغیبات تننگا ہرافتے ٹی آسان وام، ری فنڈزانا زرتس، گیس و بجلی نا مد اٹ زرتلافی نا فراوانی کون آ گام گیج آک اوار ئسر تانکہ ننا برآمد کنندگان تینا مصنوعات آتیکن پوسکن ءُ منڈی پٹنگ کیر۔ سلاہکار خزانہ پارے کہ حکومتی خڑچ آتیٹی کمتی اسہ پین بھلو فیصلہ اس ئس، کابینہ نا تنخواہ تیٹی کمتی کننگا۔ ایوان صدر و وزیراعظم ہاؤس آفس نا خڑچ آتیٹی کمتی کننگا، ہنداوڑ دفاعی خڑچ آتے منجمد کننگا، مچ آ سول حکومت نا بجٹ اٹ کمتی کننگا۔ مچ آ سال اٹی اسہ وزارت اسے ہم ودکی ضمنی گرانٹ تننگتو۔ اوپارے کہ خڑچ آتا گچین انتظام و انصرام نا جوان ءُ بھرم اس مون آ بس۔ کورونا وائرس نا دین آن مست کٹیا تیٹی ودکی نا کچ 17 درسد اسکان ریکارڈ کننگا۔ اولیکو وار پرائمری بیلنس ہرامہالو منفی ٹی ہناکہ او سرپلس اٹ ہنا۔ ساڑی حکومت مستین ہلوک آ وام تیا 5 ہزار ارب روپئی نا سود ادا کرے۔ درآمد آتا حوصلہ شکنی و برآمد آتا است بڈی ءِ کننگا۔ اوپارے کہ حکومت اِراسال اٹی حسابات جاریہ نا نسخان 20 ارب ڈالر آن کم کرسا 3 ارب ڈالر نا کچ آ اتنگ اٹ سرسہبی دوئی کرے۔ نان خراج ریونیو ٹی ودکی آ چکار کننگا، 1.1 ٹریلین نا ہدف نا مقابلہ ٹی 1.5 ٹریلین روپئی نان خراج کٹیا تا مد اٹ دوئی کننگا۔ سلاہکار خزانہ پارے کہ کورونا وائرس نا دین آن مست آئی ایم ایف بورڈ پاکستان نا اصلاحات پروگرام ئِ بھلو سرسہبی اس گونداسس۔
