اسلام آباد۔ 11 اگست (اے پی پی) وزیر خارجہ مخدوم شاہ محمود قریشی اپوزیشن نا مثبت رویہ نا ستاءِ کرسا پارینے کہ پارلیمنٹ نا اسیجائی دیوان اٹی نئے بیرہ حکومتی بلکن اپوزیشن جماعت آک ہراوڑ پامداری نا درشانی ءِ کریر او ستاکڑزک۔ سے شنبے نادے آ وزیر خارجہ ایف اے ٹی ایف و کشمیر نا بابت 6 اگست آ بٹنگوک آ پارلیمنٹ نا اسیجائی دیوان اٹ اپوزیشن نا بشخ ہلنگ و کانود جوڑ کننگ اٹ کمکاری آ مسلم لیگ (ن) نا صدر و قائد حزب اختلاف میاں شہباز شریف و پاکستان پیپلزپارٹی نا چیئرمین بلاول بھٹو زرداری ءِ منت واری نا چھٹی مون تس۔ وزیر خارجہ تینا چھٹی تیٹی پارینے کہ پارلیمنٹ نا اسیجائی دیوان اٹ نئے بیرہ حکومتی بلکن اپوزیشن جماعت آک ہراوڑ پامداری نا درشانی ءِ کریر، او ستاکڑزک۔ ای اپوزیشن نا مثبت رویہ نا ستاءِ آن فلور آف دی ہاؤس ہم کرینٹ۔ مخدوم شاہ محمود قریشی پارے کہ پارلیمنٹ اٹ ساڑی حکومتی و اپوزیشن جماعت آک اسہ وار ولدا پک کریر کہ قومی فائدہ غاتا رکھ اکن پارلیمنٹ اٹ ساڑی غٹ سیاسی جماعت آک اسہ ہی موقف اس تخرہ وزیر خارجہ پارے کہ بھارت نا کنڈآن مقبوضہ کشمیر اٹ کروک آ پنچ اگست 2019ء نا غیر آئینی و اسہ کنڈی گام گیج آتے ہم پارلیمنٹ نا غٹ سیاسی جماعت آک اسیجائی قرارداد نا کمک اٹ امنائی وڑاٹ مسترد کریسر۔ اوپارے کہ نن تدوک آ اسہ سال اٹی بھارتی غیر کانودی مقبوضہ جموں و کشمیر اٹ برجا انسانی حق آتا بھلا خلاف ورزی تے دنیا نا ہر فورم آ چست کرین۔ تدوک آ اسہ سال اٹی، اقوام متحدہ نا سیکورٹی کونسل اٹ مسہ وار کشمیر آ شرہ کننگا شاہ محمود قریشی پارے کہ 55 سال آن پد کشمیر نا ویل آ سیکورٹی کونسل اٹ شرہ مس۔ کشمیر تون اوار اہم قومی باندات آتیا ہم اپوزیشن ءِ اوار دننگ نا خواہندار اُن و اپوزیشن نا کنڈآن مون آ بروک آ عمل نا قابل سلاہ تے مدام اہمیت ترسا کینہ۔ مخدوم شاہ محمود قریشی پارے کہ کشمیر پالیسی نا بابت آخبت نا لائحہ عمل اس جوڑ کننگ کن نما کنڈآن مثبت سلاہ تا چاری مریوہ۔
