اسلام آباد۔2جولائی (اے پی پی): مزن وزیر محمد شہباز شریف ءَ گوستگیں 10سال آنی مقابلہ ءَ سال 2024-25 ءَ وفاقی ایکسائز ءِ آمدنی ءَ 42درسد گیشی ءِ واستہ وزارت خزانہ ءُ ایف بی آر ءِ کوشست آناں ساڑات ءُ گوشت کہ پاکستان ءِ اقتصادی آیوکیں وھد ءِ واستہ ھچ وڑیں لاپروائی برداشت نہ بیت۔ چار شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءِ سروکی ءَ ایف بی آر ءِ دیمروئی ءُ ایندگر اصلاحات ءِ ھوالگ ءَ ھپتگی چار ءُ تپاسی دیوان برجم دارگ بوتگ۔ مزن وزیر ءَ گوستگیں 10سال آنی مقابلہ ءَ 2024-25 ءَ وفاقی ٹیکس ءِ آمدنی ءَ 42درسد گیشی ءِ واستہ وزارت خزانہ ءُ ایف بی آر ءِ کوشست آناں ساڑات۔ آئی ءَ اے موہ ءِ سر ءَ بریفنگ ءَ را گوشت کہ مالی سال 2024-25 ءَ گوستگیں سال ءِ مقابلہ ءَ ٹیکس ءِ کانود آنی تہ ءَ اصلاحات ءُ عمل درآمد ءِ وسیلگ ءَ کل ءَ 865ارب کلدار گیش آمدنی جم کنگ بوتگ کہ اے راجدپتری 8 گناہ گیشی اِنت۔ مالی سال 2024-25 ءِ تہ ءَ وفاقی آمدنی ءِ سرجمیں تناسب 11.3درسد بوتگ کہ گوستگیں سال ءِ مقابلہ ءَ 1.5درسد گیش اِنت۔ مزن وزیر ئَ گوشت کہ نوکیں مالی سال ئَ آمدنی ئِ یکجا کنگ ئُُ ایندگر اقتصادی ٹارگٹ ئِ ھاترا ھمے محنت ئِ درشان کنگ بہ بیت، ئُُ اے سال ئَ ادارگی سستی ئِ رنگ ئَ برداشت کنگ نہ بیت۔ مزن وزیر ءَ گوشت کہ نوکیں مالی سال ءَ آمدنی ءِ یکجا کنگ ءُ اے دگہ اقتصادی ٹارگٹ آناں سرجم کنگ ءِ واستہ توامیں ادارگ ایشی ءِ واستہ سرجمیں دلگوشی ءَ گوں کار بہ کن اَنت۔ پاکستان ءِ وشیں معاشی باندات ءِ واستہ اقتصادی ٹارگٹ آنی سرجمی ءَ ہچ وڑیں لاپرواہی برداشت کنگ نہ بیت۔ مزن وزیر ءَ گوشت کہ آمدنی ءِ یکجا کنگ ءِ توامیں تک ءُ اقتصادی ٹارگٹ آنی سر ءَ ذاتی رنگ ءَ نگرانی ءَ کنگ ءَ آں۔ آئی ءَ ایف بی آر ءِ کارندہ آناں ہدایت کت کہ آ آمدنی ءِ یکجا کنگ ءُ وتی فرض ءِ پیلو کنگ ءَ الس ءَ گوں شرپ ءُ شرپ ءَ پیش بہ دار انت۔ ملکی معیشت ءِ دیمروئی ءِ واستہ درستیں سرکاری ادارہ ایف بی آر ءِ گوما سرجمی ءَ کمک بہ کن انت۔ مزن وزیر ءَ ہدایت کت کہ سامان ءِ پیداوار ءُ بھر ءُ بانگ ءِ مراگش آنی تہ ءَ ٹریک اینڈ ٹریس ڈیٹا پروڈکشن سسٹم ءَ را ھوار کنگ بہ بیت تانکہ توامیں پروڈکٹس ءَ را ٹیکس نیٹ ءَ آرگ بہ بیت، ٹیکس ڈیفالٹر ءُ توامیں صنعت آنی ادائیگی ءِ عمل ءَ را ڈیٹا ویژولائزیشن ءِ وسیلگ ءَ ٹیکس نیٹ ءَ آرگ بہ بیت۔ مزن وزیر ءَ آمدنی ءِ یکجا کنگ ءِ شوبگ ءَ ایف بی آر ءِ پوائنٹ آف سیل سسٹم ءِ دائرہ کار ءَ را گیش پراھی کنگ ءِ ہدایت کت۔ مزن وزیر ءَ دیوان ءِ بہر زوروکاں وفاقی بجٹ ءِ منظوری ءِ پد ءَ مبارکی دات۔ گند ءُ نند ءَ مزن وزیر ءَ را ایف بی آر ءَ اصلاحات ءِ ھوالگ ءَ کتگیں گامگیج آنی دیمروئی ءِ بابت ءَ سرپد کنگ بوت۔ کاروباری برادری ءُ ٹیکس دہندگانی سرجمیں آسراتی ءِ ھاتر ءَ ایف بی آر ءَ درستیں دروازگ پچ کتگ انت۔ مزن وزیر ءَ گوشت کہ ٹریک اینڈ ٹریس ڈیٹا پروڈکشن سسٹم انوگ ءَ تاں وردن، تمباکو ءُ کھاد ءِ صنعت آنی تہ ءَ سرجمی ءَ کارمرد کنگ بوتگ ءُ زوت سیمنٹ ءُ اے دگہ صنعت آنی تہ ءَ سرجمی ءَ کارمرد کنگ بیت۔ گند ءُ نند ءَ وفاقی وزیر ءِ اطلاعات ءُ شنگکاری عطا اللہ ترار، وفاقی وزیر ءِ کانود اعظم نظیر ترار، چیئرمین ایف بی آر ءُ دگہ سرکاری کارندہ آں بہر زرتگ۔
