اسلام آباد۔ 11 اگست (اے پی پی) اسپیکر قومی اسمبلی اسد قیصر پارینے کہ اقلیتی برادری تا حق آتا رکھ ساڑی حکومت نا اولیت آتیٹی اوار ءِ، اسلام غٹ مذہب آتا منوک آتے بریبری نا حق فراوان کیک، اسلام غٹ مذہب آتے پورو مذہبی آجوئی اٹ زند ءِ تیر کننگ نا موکل ایتک، پاکستان نا آئین ہم اقلیتی برادری تا حق انا ضمانت ایتک، غٹ اقلیت آتے تینا مذہب و عقیدہ غاتا رداٹ زند ءِ تیر کننگ نا پورو آجوئی ایتک۔ ساڑی حکومت اقلیت آتا حق انا رکھ آ باور کیک۔ قومی اسمبلی سیکرٹریٹ نا رداٹ داخیال آتا درشانی ءِ او سے شنبے نادے آ اقلیت آتا قومی دے انا وخت آ تینا کلہو اٹی کرے۔ اسپیکر قومی اسمبلی پارے کہ اقلیتی برادری تا حق انا رکھ ساڑی حکومت نا اولیت آتیٹی اوار ءِ۔ اسلام غٹ مذہب آتا منوک آتے بریبری نا حق فراوان کیک۔ اسلام غٹ مذہب آتے پورو مذہبی آجوئی اٹ زند ءِ تیر کننگ نا موکل ایتک۔ اوپارے کہ پاکستان نا آئین ہم اقلیتی برادری تا حق انا ضمانت ءِ ایتک۔ غٹ اقلیت آتے تینا مذہب و عقیدہ غاتا رداٹ زند ءِ تیر کننگ نا پورو آجوئی ایتک۔ ساڑی حکومت اقلیت آتا حق انا رکھ آ باور کیک۔ اوپارے کہ 11اگست 1947 ء آ قائد اعظم محمد علی جناح کانود ساز اسمبلی نا اولیکو دیوان آن تران کریسس۔ داتران اٹی قائد اعظم محمد علی جناح اقلیت آتا حق انا رکھ انا ہیت ءِ کریسس۔ قائد اعظم محمد علی جناح تران اٹی پاکستان اٹ رہینگوک آ غٹ مذہب آتے بریبر حق تننگ نا پاریسس۔ بابائے قوم تران کریسس کہ پاکستان اٹ ہر اسٹ ءِ تینا عقیدہ و مذہب نا رداٹ عبادت کننگ نا پورو آجوئی دوئی مریک۔ اسد قیصر پارے کہ قائد اعظم نارمائشت آتے مون آ تخسا اقلیتی برادری نا حق انا رکھ ءِ پک کننگ انگ ءِ۔ اقلیت آتے مذہبی رسم و رواج نا رداٹ زند ءِ تیر کننگ کن ہروڑنا گام گیج کننگ انگ ءِ۔ اوپارے کہ ساڑی حکومت اقتدار اٹ بننگ تون کرتارپور راہداری نا ڈٹ ءِ عملی دروشم اس تس۔ ہراداہیت انا شاہدی ءِ کہ ساڑی حکومت اقلیتی برادری نا مذہبی آجوئی آ باورکیک۔ پاکستان نا آئین نا رداٹ ایوان اٹ اقلیتی برادری ءِ جوان ءُ نمائندگی اس دوئی ءِ۔ پاکستان اٹ غٹ اقلیت آتے لس گچین کاری تیٹی وونٹ تننگ نا حق ہم دوئی ءِ۔ اوپارے کہ ایوان اٹ ساڑی اقلیتی نمائندہ غاک کانود جوڑ کننگ نا عمل اٹ بے کچ جوان ءُ کڑد اس ادا کننگ ءُ۔ ملک انا شونداری و شونہالی ٹی اقلیتی برادری تا کڑد ستاکڑزک۔ ملک انا شونداری و شونہالی ٹی اقلیتی برادری پبی کڑد ادا کننگ ءِ۔ اسپیکر قومی اسمبلی پارے کہ پاکستان اٹ رہینگوک آ غٹ مذہب آتا منوک آک پاکستانی ءُ۔ ننے اسہ قوم اس جوڑ مرسا ملک و قوم نا شونداری کن جہد کروئی مریک۔ بھارت نا فاشٹ حکومت بھارت اٹ اقلیت خاص کر مسلمان تیا ڈغار ءِ تنک کرینے۔ بھارت اٹ مسلم اقلیت آتیاکروک آ بیدادی است ہسونی و مذمب نا قابل ءِ۔ بنیاد پرست مودی سرکار نا دور حکومت اٹ بھارت اٹی اقلیت آتون بھاز نامناسب رویہ تخنگ انگ ءِ۔ اوپارے کہ بھارتی حکومت بھارت آن اقلیت آتے ہمپنگ آ بیوس کننگ ءِ۔ ہراگڑتی نا سوب ءِ۔ جہانی برادری آرایس ایس نا پیروکار مودی سرکار نا کنڈآن مسلمان تیا کروک آ بیدادی تا نوٹس ءِ ہلے۔
