اسلام آباد۔ 28 فروری (اے پی پی) سلاہکار خارجہ سرتاج عزیز پارینے کہ اقتصادی کمکار تنظیم (ای سی او) ڈیہہ ئِ سوگو اقتصادی بلاک اٹی بدل کننگ کن اسیجائی کوشست آتا گرج ئِ، علاقائی رابطہ غاتا کمتی اقتصادی کمکاری ٹی غٹ آن بھلا اڑاند ئِ ، پاکستان ڈیہہ ئِ اقتصادی شونہالی و شونداری آن ہمکنار کرفنگ کن ای سی او نا لائخی تیا پورو یخین تخک اینو نا تین پہ تین مربوط دنیا ٹی جہانی امن و سوگوی و شونہالی نا تنیا دوئی ممکن اف۔ ای سی او نا واپاری معاہدہ غاتیا عملدرآمد ، واپاری و غیر واپاری اڑاند آتے مر کننگ و ڈیہہ ٹی آزادانہ واپاری زون اس اڈتننگ نا گرج ئِ۔ سے شنبے آ داڑے اقتصادی کمکار تنظیم نا وزارائے خارجہ کونسل نا 22می دیوان نا چیئرمین شپ انا زمواری ئِ سنبھالنگ آن پد تران کرسا سلاہکار خارجہ ڈیہہ نا غٹ انسانی و مادی وسیلہ غاتیان پبی فائدہ ہرفسا ای سی او ئِ اسہ سوگو ئُ اقتصادی بلاک اسے ٹی بدل کننگ نا غرض آن اسیجائی کوشست آتا گرج آ زورشاغا۔ اوپارے کہ ڈیہہ ٹی تین پہ تینی واپارئِ مون آ دننگ کن باسک ملک آتا نیام اٹ ریل، روڈ، سمندری و فضائی رابطہ غاتا سخت گرج ئِ، ای سی او ڈیہہ سی پیک و گوادر پورٹ آن فائدہ ہرفنگ کیک۔ علاقائی رابطہ غاتا کمتی اقتصادی کمکاری ٹی غٹ آن بھلا اڑاند ئِ۔ سرتاج عزیز پارے کہ ای سی او واپار و شونداری بینک آن بیدس ای سی او ری انشورنس کمپنی نا سرجز، سکوپ و ممبر شپ اٹی ودکی نا گرج ئِ۔ اوباسک ملک آتا نیام اٹ ای سی او چیمبرز آف کامرس و صنعت نا کمک اٹ زرکاری و نجی بشخ آتا نیام اٹ کمکاری و ڈیہہ ٹی سائنسی و تکنیکی کمکاری ئِ مون آ دننگ کن ای سی او سائنس فاﺅنڈیشن نا رکنیت اٹی ودکی نا سلاہ ئِ ہم تس۔ سلاہکار خارجہ باسک ملک آتا نیام اٹ جمہوری اقدار نا مون آ دننگ کن ای سی او پارلیمانی اسمبلی نا پلیٹ فارم ئِ کاریم اٹ اتنگ نا خواست کرے۔ سلاہکار خارجہ ساڑی مروک آتے پاکستان نا اقتصادی سرسہبی تا بارواٹی ہم معلومدار کرے و پارے کہ پاکستان گدرینگوک آ چارسال اٹی اقتصادی اصلاحات نا کمک اٹ اقتصادی شونداری نا 4.7 درسد ہدف دوئی کرینے وخت اس کہ مثبت اقتصادی سرجزآتیان درملکی زرکارآتا پت اٹی ہم ودکی مسنے۔ اوپارے کہ ڈیہہ ئِ دہشت گردی، منشیات نا سمگلنگ و ایلو منظم ڈوہ آتون اوار کیہی چیلنج آتا مون تروکی ئِ، تعلقدار چیلنج آتا مون ئِ توننگ و ڈیہہ نا شونداری ایجنڈا ئِ مون آ دننگ کن اسیجائی کوشست آتا گرج ئِ۔ دیوان آن تران کرسا وزرائے خارجہ کونسل نا سبکدوش مروک آ چیئرمین و ایران نا وزیر خارجہ محمد جواد ظریف پارے کہ تنظیم ئِ ای سی او وژن 2025ءآ عملدرآمد کن تینا غٹ تر توانائی تے کاریم اٹ بایدے اتے۔ سیکرٹری جنرل ای سی او ہلال ابراہیم تینا تران اٹی شونداری و شونہالی کن پائیدار کوشست و تنظیم نا غٹ تر لائخی تے کاریم اٹ اتنگ نا گرج آ زورشاغا ۔ اوپارے کہ ای سی او ڈیہہ ناآبادی 471ملین وخت اس کہ جم اٹنگا قومی پیداوار (جی ڈی پی) اسہ کھرب ڈالر اسکان سرمسنے۔ اوپارے کہ 2000 ٹی 5.3درسد نا نسبت 2016ٹی باسک ملک آتا نیام اٹ تین پہ تینی واپار اٹی 8.3 درسد ودکی مسنے ۔ سیکرٹری جنرل واپار، زرکاری ، ٹرانسپورٹ ، مواصلات ، توانائی ، ماحولیات تون اوار چندی بشخ آتیٹی ڈٹ آتے تالان کرے۔ اوپارے کہ ای سی او قدرتی آفت آتا خلیس آتیٹی کمتی کن علاقائی فریم ورک اس تیار کننگ ئِ۔
