حکومت راولپنڈی ءُ اسلام آباد ءَ آپ ءِ جیڈھ آنی دائمی گیواری ءِ واستہ سنگینیں گامگیج زورگ ءَ انت، بیرسٹر دانیال چوہدری

اسلام آباد۔24جون  (اے پی پی): پارلیمانی سیکرٹری برائے انفارمیشن اینڈ براڈکاسٹنگ بیرسٹر دانیال چوہدری ءَ گوشت کہ حکومت راولپنڈی ءُ اسلام آباد ءَ آپ ءِ جیڈھ آنی دائمی گیواری ءِ واستہ سنگینیں گامگیج زورگ ءَ انت ءُ غازی باروتہ ءَ ھوار آپ ءِ ھاسیں منصوبگ آنی سر ءَ پیشرفت بوھگ ءَ انت۔ چار شمبے ءِ روچ ءَ پارلیمنٹ گس ءِ ڈن ءَ میڈیا ءَ گوں تران کنان ءَ آئی ءَ گوشت کہ آپ ءِ جیڈھ اے وھد ءَ ملک ءِ مستریں جیڈھ آں چہ یکے انت ءُ ایشی ءِ گیواری ءِ واستہ حکومت یک ھمگرنچیں پالیسی ءِ چیر دستی ءَ کار کنگ ءَ انت۔ راولپنڈی ءُ اسلام آباد ءِ الس آناں آپ ءِ پھجاری ءِ واستہ جتاجتائیں منصوبگ آنی سر ءَ کار کنگ بوھگ ءَ انت۔ بیرسٹر دانیال چوہدری ءَ گوشت کہ غازی بروتھا منصوبگ سک باز ارزشت ءِ واھند اِنت ءُ حکومت ایشی ءِ سرجمی ءِ واستہ جزم اِنت۔ آئی ءَ گوشت کہ گوستگیں وھد ءَ ھم راولپنڈی ءَ آپ ءِ پھجارینگ ءِ واستہ جتا جتائیں منصوبگ آنی سر ءَ کار کنگ بوتگ ءُ منظور کنگ بوتگ وھدیکہ انوگیں حکومت ھم اے سلسلہ ءَ را دیم ءَ برگ ءَ اِنت۔ آئی ءَ گوشت کہ حکومت حکومت ءِ اے وھد ءَ راولپنڈی ءِ آپ ءِ جیڈھ ءَ را انچیں رنگ ءَ گیش ءُ گیوار کنگ ءِ کوشست ءَ کنگ ءَ انت کہ آیوکیں بیست ءَ چہ بیست ءُ پنچ سال ءَ اے درگت ءَ شھمکی ھچ وڑیں جیڈھ ءَ گوں دیم پہ دیم مہ بنت۔ میونسپل سسٹم ءِ ھوالگ ءَ جست ءِ پسو ءَ پارلیمانی سیکرٹری ءَ گوشت کہ بنیاتی شھمکی آسراتی ءُ بنیاتی ڈھانچہ ءِ ھوالگ ءَ ملک ءِ مزنیں شھمک ھاسیں رنگ ءَ کراچی ءِ جیڈھ آناں گیواری ءِ سر ءَ ھاسیں دلگوشی دیگ بوھگ ءَ اِنت۔ آئی ءَ گوشت کہ فیڈریشن شھمکی جیڈھ آناں گیواری ءِ تہ ءَ وتی کرد ءَ را برجاہ دار ایت وھدیکہ السی جیڈھ آنی سر ءَ چمشانک دیوکیں مردم آنی پنت ءُ شون آناں وش اتک کنگ بیت۔ آئی ءَ گوشت کہ حکومت ءَ اتحادی گل آنی کمک ءَ گوں سوبمندی ءَ بجٹ منظور کتگ نوں الس ءِ دیم ءَ اوشتاتگیں کسان ءُ مزنیں جیڈھ آنی گیواری ءِ سر ءَ گیش دلگوشی دیگ بیت۔ یک جست ءِ پسو ءَ بیرسٹر دانیال چوہدری ءَ گوشت کہ کراچی ءُ لاہور دوئیں مزنیں ءُ ھاسیں شھمک اَنت کہ آھانی جیڈھ ءُ لوٹ جتا جتائیں اَنت، البت حکومت دوئیں شھمک آنی تہ ءَ دیمروئی منصوبگ ءُ انفراسٹرکچر ءِ گہتری ءِ واستہ کار کنگ ءَ اِنت۔ آئی ءَ گوشت کہ ھمک آیوکیں روچ الس ءِ واستہ گہتری ءُ دیمروئی ءِ نوکیں امیت ءَ آرگ ءَ انت۔