کالعدم ایکشن کمیٹی ءَ زانت ءُ  سرپدی  ءَ کاروباری زند ءَ را آماچ کتگ ءُ سول ءُ تران ءِ دروازگ بند کتگ انت، طارق فضل چوہدری

اسلام آباد۔24جون  (اے پی پی): پارلیمانی کارانی وفاقی وزیر ڈاکٹر طارق فضل چوہدری ءَ گشتگ کہ آزات کشمیر ءَ دھرنہ ءِ سر ءَ نشتگیں کالعدم ایکشن کمیٹی  ءَ زانت ءُ سرپدی  ءَ کاروباری زند ءَ را آماچ کتگ ءُ گپ ءُ تران ءِ دروازگ بند کتگ انت۔ اودا سیکورٹی فورسز ءِ چار کارندہ وتی جان ندر کتگ انت۔ ریاست ھما کرد ءَ پیلو کنت کہ آ زوراکی ءِ نیمگ ءَ رھادگ بوھوکیں مردمانی ھلاپ ءَ اِنت۔ ما اے ھال ءِ پدرائی کتگ کہ آ زوراکی ءِ راہ ءَ اَنت۔ چار شمبے ءِ روچ ءَ راجی اسمبلی ءَ تران کنان ءَ آئی ءَ گوشت کہ ایف سی ءِ کارندہ ءَ ھوار چار کارندہ شہید  کنگ بوتگ ۔ آ وتی لوٹانی سر ءَ پرامنیں رنگے ءَ گپ جنگ ءَ ساڑی نہ اَنت۔ ما ایشانی دیم ءَ درستیں آپشن ایر کتگ انت بلے ایشاں گپ ءُ تران کنگ ءَ چہ انکار کتگ۔ آزات کشمیر ءَ پہ زانت کاروباری زند ءَ را آماچ کنگ ءَ انت ءُ وت گپ ءُ تران ءِ دروازگ بند کتگ انت ۔ آئی ءَ گوشت کہ گپ ءُ تران ءَ چہ اے جیڈھ ءَ را یک وڑے ءَ گیش ءُ گیوار بوت کنت، بلے ایشاں زرتگیں راہ ءِ سر ءَ ریاست وتی کرد ءَ پیلو کنگ ءَ انت ءُ آیوکیں وھد ءَ ھم وتی کرد ءَ پیلو کنت۔ آئی ءَ گوشت کہ مئے کر ءَ معتبریں ھال است انت کہ اے زوراکی ءِ پُشت ءَ درائیں عناصر ھوار انت پرچا کہ آ ادا وھد ءِ سر ءَ گچین کاری نہ لوٹ انت۔ آزات کشمیر ءِ عبوری آئین ءِ تہا ایشی ءِ گنجائش نیست۔ ھما مردم کہ لوٹ اَنت کہ گچین کاری وھد ءِ سر ءَ مہ بنت آ ریاست ءِ نپانی ھلاپ ءَ کار کنگ ءَ اَنت ۔ مئے ہچ وزیر ءَ اے دعویٰ نہ کتگ کہ آہانی پارٹی ءَ مہاجر ءِ سیٹ رسیت۔ باز رند ءَ چوش بوتگ کہ پنجاب ءَ مسلم لیگ ن ءِ سرکار ءِ باوجود (ن) لیگ چہ اد ءَ سوب مند نہ بوتگ۔ آئی ءَ گوشت کہ اگاں ما گوست ءَ بچاریں گڑا وفاق ءَ ھما پارٹی کہ سرکار ءَ انت آ آزات کشمیر ءَ ھم سرکار جوڑ کنت ءُ مہاجر ءُ آزات کشمیر ءِ سیٹ آنی سر ءَ ھم یکیں وھد ءَ گچین کاری بنت ۔ اے سیٹ پنجاب ءَ ابید کراچی ءُ خیبر پختونخوا ءَ ہم است انت۔ ما آزات کشمیر ءِ ھاتر ءَ جہد کتگ ۔ آئی ءَ گْوشتگ کہ گوستگیں سال ءَ زھرشانی ءِ وھد ءَ ایکشن کمیٹی ءَ وتی جان ندر کنوکیں مردمانی کھول سرکاری نوکری دیگ بوتگ اَنت، ءُ آٹ ءُ بجلی ءِ سر ءَ سبسڈی انگت ءَ ھست اِنت۔ اے درستیں آسراتی سرکاری رنگ ءِ اَنت ءُ کشگ نہ بوتگ اَنت، ایوک ءَ سرکار ءَ وتی گورننس جوڑ کتگ ءُ سرکار ءِ گور ءَ دگہ راہ نیست۔