استیں جیو پولیٹیکل جاور ھال ءِ تہ ءَ پاکستان ءِ واستہ استیں موہ آناں سرجمی ءَ پائدگ چست کنگ ءِ واستہ تپاکی المی اِنت، منی واھگ اِنت کہ مزن وزیر سوبمند بہ بیت، بلاول بھٹو زرداری ءَ راجی اسمبلی ءَ وتی ھیالانی درشان

اسلام آباد۔24جون  (اے پی پی): پاکستان پیپلز پارٹی ءِ چیئرمین بلاول بھٹو زرداری ءَ گشتگ اگاں درستیں سیاسی گل یکجا بہ بنت ءُ اے فیصلہ بہ کن انت کہ ما یکجائی ءَ درستیں جیڑہانی دیم ءَ دارگ ءَ ایں گڈا استیں جیو پولیٹیکل جاوراں پاکستان ءِ واستہ استیں موہ آں چہ سرجمی ءَ پائدگ چست کنگ بوت کنت۔ استیں جیو پولیٹیکل جاور ھال ءَ پاکستان ءِ واستہ استیں موہ آناں سرجمی ءَ پائدگ چست کنگ ءِ واستہ تپاکی المی انت، منی واھگ انت کہ مزن وزیر سوبمند بہ بیت پرچا کہ اگاں مزن وزیر سوبمند بہ بیت گڈا پاکستان سوبمند بیت۔ چار شمبے ءِ روچ ءَ وھدے راجی اسمبلی ءِ دیوان ءَ اعتراض ءِ نقطہ چست کت آئی ءَ گوشت کہ اولی رند ءَ من وزیر ھزانگ ءَ چہ پہلی لوٹ  کتگ پرچا کہ مئے ارادہ بجٹ ءِ عمل ءَ را سرجم کنگ بوتگ۔ من سک باز جہد کت کہ درستیں گشتانکاں سرجم بہ کناں ءُ اے پڑ ءَ سر بہ باں بلے انچو بازیں سرھال پچ بوت انت کہ من ءَ ھم وتی لیکہ پیش کنگی ات۔ بلاول بھٹو زرداری ءَ گشتگ من دو رند ءَ مزن وزیر ووٹ داتگ ۔ محنت، کار اخلاقیات، نیت ءُ انداز کہ آئی ءَ گوں اتحادی ءُ اپوزیشن ءَ رابطہ کتگ، اے گپ پدر انت کہ آ ملک ءَ را مشکلیں جاوراں چہ جوانیں رنگے ءَ در کنگ لوٹیت۔ اگاں راج ءُ درستیں سیاسی گل یکجا بہ بنت ءُ اے پیسلہ بہ کن اَنت کہ ما یکجائی ءَ گوں درستیں جیڑہاں دیم پہ دیم کن ایں گڈا استیں جیوپولیٹکل جاورھال ءَ پاکستان ءِ گور ءَ ھستیں موہاں سرجمی ءَ کارمرز کنگ بیت کنت۔ اجماع پہ ایشی ءَ المی اِنت۔ بلے آئی ءَ لھتیں وزیرانی بیانانی سر ءَ تحفظات درشان کتگ ءُ جست کتگ کہ آ پرچا انچیں گپ جن اَنت یا انچیں پنت ءُ شون کن اَنت کہ اے کار ءَ را رکاوٹ جوڑ کن اَنت۔ رانا ثنا اللہ ءِ شرپ ءَ کناں، نواز شریف ءِ کشمیر ءِ گوما سیادی ءَ را کس انکار کت نہ کنت۔ اگاں مولانا فضل الرحمن ءَ مرچی زمہ واری ءِ درشانی کتگ گڈا حکومت ہم انچیں موقف بہ زوریت کہ ایشی ءَ چہ سیاسی گیواری ءِ راہ پچ بہ بیت۔ مولانا فضل الرحمن ءَ ہمے موہ دیگ بہ بیت کہ ہمگرنچیں فریقاں گوں گپ ءُ تران بہ کنت ءُ اے جیڑہ ءِ گیشواری ءَ انچیں وڑے ءَ بہ شوہاز ایت کہ مہلوک ءَ بار بار زھمکشانی کنگ مہ بیت ءُ کشمیر ءِ معاملہ ہم ایمن بہ بیت۔ بلاول بھٹو زرداری ءَ گوشت کہ دراھیں سیاسی جیڈھ سیاسی رنگ ءَ گیش ءُ گیوار بوت کن اَنت، ءُ منی سرپدی ءِ رد ءَ اے مزن وزیر ءِ ھم واھگ اِنت۔ آئی ءَ گوشت کہ پیپلز پارٹی ءَ آئین ءِ بُن ھشت ایر کتگ ءُ آئین ءِ ھژدہمی ترمیم ھم منظور کتگ۔ پیپلز پارٹی ءَ کراچی ءَ مئے عزت مندیں سنگتاں گوں مسلہ نیست، بلے لھتے سنگت گوں ایشاں سیاست کنگ ءَ انت۔ گیشتر لوٹ ءُ نوکیں گپ چِست کنگ ءِ بدل ءَ شرتر اِنت کہ اگاں تپاوت بیت گُڑا اے سنگت چہ سرکار ءَ جتا بہ بنت۔ پیپلز پارٹی ءِ چیئرمین ءَ گشتگ کہ تاں جاہ ءَ کہ بنجاہی حکومت ءِ نظام ءِ گپ انت ہما جاہ ءَ کہ پیپلز پارٹی ءِ حاکم انت اودا بنجاہی حکومت ءِ نظام انت، ہما بنجاہی حکومت ءِ نظام کہ کراچی ءَ است انت۔ مئے لوٹ اِنت کہ سرجمیں ملک ءَ بنجاہی سرکار ءِ گچین کاری کنگ بہ بنت۔ ما نود روچ ءِ تہ ءَ گلگت بلتستان ءَ ھم بنجاہی سرکار ءِ گچینکاری کن ایں ۔ منی واھگ اِنت کہ مزن وزیر سوبمند بہ بیت، پرچا کہ اگاں مزن وزیر سوبمند بہ بیت گڑا پاکستان سوبمند بیت۔