اسلام آباد۔ 28 فروری (اے پی پی) وزیراعظم محمد نواز شریف دااومیت نا درشانی ئِ کرینے کہ 13می اقتصادی کمکار تنظیم کانفرنس نا اسلام آباد اعلامیہ و ای سی او وژن 2025ءآن ڈیہہ ٹی اقتصادی شونہالی ئِ مون آ دننگ دوئی مریک و علاقائی سالمیت و رابطہ غاتے ودفنگ اٹی کمک رسینگک۔ داخیال آتا درشانی ئِ او ای سی او نا سیکرٹری جنرل حلیل ابراہیم تون ہیت وگپ کرسا کرے ہراسے شنبے آ داڑے اوڑتون اوڑدہی کرے۔ ای سی او نا سیکرٹری جنرل 13می اقتصادی کمکار تنظیم نا دیوان کن پاکستان آ بسنے۔ وزیراعظم محمد نواز شریف اسلام آباد اٹی 13می ای سی او کانفرنس نا اڈتننگ نا چرجوئی ٹی ای سی او نا سیکرٹری جنرل و اونا ٹیم انا ستائِ کرے۔ اواقتصادی کمکار تنظیم نا باسک ملک آتیٹی ساڑی وارخواہی، اونا اسیجائی مفادات، دودوربیدہ ہی میرات و جغرافیائی قربت نا ذکر ئِ کرے۔ وزیراعظم پارے کہ پاکستان ای سی او نا چارٹر نا رداٹ دانا مسخت آتا دوئی کن پرعزم ئِ۔ ای سی او نا سیکرٹری جنرل ای سی او کانفرنس نا میزبانی و داڑکن گچین بست وبند آتیا وزیراعظم محمد نواز شریف نا منت واری ئِ ادا کرے۔ اوعلاقائی رابطہ و گیشتر علاقائی سالمیت کن وزیراعظم نا وژن نا ہم ستائِ کرے۔
