اسلام آباد۔ 28 فروری (اے پی پی) چین پاکستان اقتصادی راہداری ڈٹ انا دیکی روٹ آ ترندی اٹ کاریم برجائِ۔ ہکلہ۔یارک 285کلومیٹر مریس روٹ 5پیکج آتیا تالان ئِ ، پیکج ون 13.3ارب روپئی نا ڈٹ ئِ ہراکہ ستمبر 2018ءاسکان پورو مریک۔ سرکاری ذرائع نا رداٹ پیکج ٹورحمان خیل آن میانوالی 72کلومیٹر نا روٹ ئِ، پیکج تھری نا رداٹ میانوالی آن تراب اسکان 52کلومیٹرروٹ آ 20.6ارب روپئی نا خڑچ بریک دانا پوروی اکتوبر 2018ءاسکان مریک، ژوب آن مغل کوٹ اسکان 81کلومیٹر روٹ آ 8 ارب روپئی نا خڑچ بریک و دااگست 2018ءاسکان پورو مریک۔ کے پی ٹی 40 کلومیٹر میانوالی آن ڈی آئی خان پوسکن ئُ روٹ اس جوڑ مننگ ئِ۔ مسٹ میکو روٹ ژوب آن کوئٹہ 231کلومیٹر نا ٹریک ئِ، چائنہ داٹریک اٹی 2لین پین ودفنگ نا سلاہ تسنے، داروٹ آ داسکان کاریم نا بنامتنے۔ چین داروٹ ئِ سی پیک نا بشخ جوڑ کرینے، مون نا روٹ کوئٹہ آن خضدار اسکان ئِ ہراکہ 441کلومیٹر مریس ئُ روٹ اسے و دانا ڈیزائن نا بابت تفصیلارمئی 2017ءاسکان پورو مریک۔ ہنداروٹ ولدا مون آ سہراب وخوشاب تون ملک ہرا خوشاب آن تربت و گوادر ئِ ملفک۔ داڑآ 13بلین روپئی نا خڑچ انا تخمینہ خلنگانے، 193 کلومیٹر روٹ آ فروری 2016ءآں کاریم نا بنامسنے، کوئٹہ آن گوادر اسکان سفر آ مہالو اِرا دے لگاکہ ولے داسہ دا 8گھنٹہ نا سفر ئِ۔ ذرائع نا رداٹ اقتصادی راہداری ہڑتوم آ ملک آتا نیام اٹ اہم بشخ آتیٹی کمکاری آمبنی گام گیج و ڈٹ آتا جامع پیکج ئِ ہراٹی احوالی نیٹ ورک ، بنداوی ڈھانچہ، توانائی، صنعت، کشت وکشار، سیل و سوات و چندی ایلو بشخ آک اوار ئُ۔ پاک چین کمکاری نا ڈٹ آتا پوروی آن پاکستان شونداری نا شاہراہ ٹی اہم مزل نا نشان اسے عبور کیک۔ ہراتم داڈٹ ایسری اسکان سرمریک تو اسہ بدلینگوک ئُ پاکستان اس مون آ بریک ہراجاگہ نا الس ئِ توانائی ، مواصلات ، ہن و بر، صنعت وحرفت ، کاروبار ، روزگار، سیل و سوات و بے شمار اقتصادی شونداری نا آسراتی و وارخواہی دوبریک و پاکستان اقوام عالم اٹی شونداری یافتہ ملک آتا صف اٹی سلک۔
