قندوز کن طالبان تا شیڈو گورنر ملا عبدالسلام امریکی ڈرون جلہو اٹی خلنگا
کابل۔ 27 فروری (اے پی پی) اوغانستان نا سیکورٹی فورس آک ملک اٹی چندی کارروائی تیٹی طالبان نا اِرا شیڈو گورنر آتون اوار 21 بندغ نا تپاخت کننگ نا داوا کرینو ، قندوز کن طالبان نا شیڈو گورنر ملا عبدالسلام امریکی ڈرون جلہو اٹی خلنگا ۔ اوغان میڈیا نا رداٹ کابل اٹی وزارت دفاع نا کنڈآن جاری مروک آ اسہ بیان اسے ٹی پاننگانے کہ گدرینگوک آ 24گھنٹہ ٹی ملک انا چندی علاقہ غاتیٹی دہشت گرد و عسکریت پسند آتا برخلاف کارروائی کننگا ہرافتے ٹی طالبا ن نا ارزگان کن شیڈو گورنر شیخ حمزہ تون اوار 21عسکریت پسند تپاخت کریر۔ دا کارروائیک ننگر ہار، کپیسا ، پکتیا، پکتیکا، غزنی ، لوگر ، خوست ، بامیان ، ارزگان ، زابل ، بغلان و قندوز اٹی کننگار۔ کہوک آتیٹی طالبان نا اہم راہشون حاجی عبداللہ نا تپاخت کننگ نا ہم داوا کننگانے۔ داکان بیدس قطبی صوبہ قندوز اٹی امریکی جاسوس جہاز اسے نا جلہو اٹی قندوز کن طالبان نا پندار شیڈوگورنر نا تپاخت کننگ نا داوا کننگانے۔ ترجمان گورنر قندوز میڈیا ئِ پارینے کہ قندوز نا ضلع دشت آرچی ٹی امریکی جاسوس جہاز نا جلہو اٹی صوبہ کن طالبان نا پندار گورنر ملا عبدالسلام تینا مسہ سنگت آتون اوار تپاخت کرینے۔ داکان بیدس اوغان کمامدارآک خودکش جلہو اٹی ملا عبدالسلام نا ٹھپی مننگ و اونا تاجکستان گدریفنگ نا داوا کریسس۔
