نیشنل لاجسٹکس کارپوریشن ءِ دمگی تجارت ءِ دیمروئی ءِ تہا کلیتی کرد پیلو کنگ ءَ انت، احسن اقبال

اسلام آباد۔29جولائی  (اے پی پی): نیشنل لاجسٹکس کارپوریشن ملک ءِ تجارتی کاروائی ءُ دمگی رابطہ کاری ءِ دیمروئی ءِ تہ ءَ کلیتی کرد پیلو کنگ ءَ اِنت۔ سرھاد آباد، ترکمانستان، ترمز، ازبکستان ءُ چین ءِ کشگر ءَ فارورڈ ٹرانزٹ ٹریڈ سنٹر آنی جوڑ کنگ ءَ پاکستان ءِ میان اُستمانی ایشیا ءُ دمگ ءِ ایندگر مارکیٹ آنی تہ ءَ تجارتی رسائی ءَ را گیش مھکم کنگ ءَ اِنت۔ منصوبگ بندی، دیمروئی، اصلاحات ءُ ھاسیں گامگیج آنی وفاقی وزیر پروفیسر احسن اقبال ءَ پنت ءُ شون کت کہ ساسا ڈرائی پورٹ ءُ خنجراب بارڈر ٹرمینل ءَ را پاکستان ءِ برآمدات ءُ دمگی تجارتی رابطہ ءِ ھاتر ءَ اسٹریٹجک مراگش ءِ رنگ ءَ گیش وسعت دیگ بہ بیت تانکہ نوکیں آسراتی آنی وسیلگ ءَ میاں اوستمانی تجارت ءَ را دیمروئی دیگ بہ بیت۔ وفاقی وزیر ءَ جھان ءِ مارکیٹ ءُ چین پاکستان ءِ اقتصادی راہداری ءِ لوٹ آنی گوما ھمگرنچیں انٹرنیشنل اسٹینڈرڈ ڈرائیونگ اکیڈمی ءِ جوڑ کنگ ءِ سر ءَ ھم زور پر دات۔ آئی ءَ گوشت کہ اکیڈمی ءَ کزبی کار کرد ڈرائیونگ ءِ گوما دری زبان ءِ تربیت ھم دیگ بہ بیت تانکہ پاکستانی ڈرائیور سرحد ءِ سرا رسد ءُ میاں اوستمانی سپلائی چین آنی تہ ءَ جوانیں رنگ ءَ خدمت کت کن اَنت۔ پروفیسر احسن اقبال ءَ گوشت کہ مرچیگیں دور ءَ رسد ایوک ءَ سامان ءِ ٹرانسپورٹ نہ اِنت بلکیں اے راجی معیشت ءِ ریڑھ ءِ ھڈ اِنت، پائیدار سپلائی چین ءِ بُن ھشت اِنت ءُ اقتصادی دیمروئی ءِ اسٹریٹجک ستون اِنت۔ آئی ءَ گوشت کہ ’’اُدان پاکستان‘‘ ءِ مول ءُ مراد آنی سرجمی ءِ واستہ نوکیں، یکجا ءُ ٹیکنالوجی ءِ وسیلگ ءَ رسد ءِ نظام المی اِنت، ھاسیں رنگ ءَ برآمد ءِ سروکی ءَ اقتصادی دیمروئی، صنعتی مقابلہ ءُ دمگی رابطہ ءِ واستہ المی اِنت۔ آئی ءَ وتی جزم ءِ درشان کت کہ پاکستان ءَ را جنوبی ایشیا، میاں اوستمانی ایشیا، چین ءُ میاں اوستمانی تک ءِ نیام ءَ تجارت ءُ رسد ءِ واستہ مرکزی مرکز جوڑ کنگ حکومت ءِ اولی ترجی اِنت ءُ اے مول ءُ مراد ءِ سرجم کنگ ءِ واستہ بنیاتی ڈھانچہ، نوکیں ٹرانزٹ آسراتی ءُ انسانی وسیلگ آنی دیمروئی ءِ سر ءَ ھاسیں دلگوشی دیگ بوھگ ءَ اِنت۔