قازقستان ءِ سفیر ءَ وفاقی وزیر برائے میری ٹائم   ءَ گوں گند ءُ نند کت، پاکستانی دکہ آنی وسیلگ ءَ بیپار ءِ تہ ءَ گیشی ءِ بابت ءَ گپ ءُ تران

اسلام آباد۔29جولائی  (اے پی پی): قازقستان ءِ سفیر یرزہان کستافین  ءَ وفاقی وزیر ءِ دریائی کارانی محمد جنید انور چوہدری ءَ گوں الوداعی گند ءُ نند کت۔ وزارت بحری امور ءِ نیمگ ءَ جاڑی بوتگیں بیان ءِ رد ءَ گند ءُ نند ءَ پاکستانی دکہ آنی وسیلگ ءَ دو نیمگی تجارت ءَ را دیمروئی دیگ، شپنگ ءِ تہ ءَ گہتری، تجارتی آسراتی ءُ دمگی رابطہ کاری ءِ ھوار بحری کمک آنی تہ ءَ گیشی ءِ سر ءَ ھیال ریچی کنگ بوتگ۔ محمد جنید انور چوہدری ءَ پاکستان ءُ قازقستان ءِ نیام ءَ سیادی ءَ را مھکم کنگ ءِ واستہ سفیر یرزہان کستافین  ءِ ازمت آناں ساڑات ءُ گوشت کہ دوئیں ملک آنی نیام ءَ میری ٹائم سیکٹر ءَ کمک ءَ را گیش پراھی کنگ ءِ ضلورت اِنت۔ آئی ءَ گوشت کہ پاکستان دکہ، جہاز رانی، تجارتی آسراتی ءُ دمگی رابطہ ءِ شوبگ آنی تہ ءَ قازقستان ءِ گوما کمک ءَ را گیش کنگ ءِ واھشت مند اِنت، وھدیکہ مھکمیں میری ٹائم رابطہ دوئیں ملک آنی کاروباری دائرہ آنی واستہ نوکیں موہ پیداک کت کن اَنت۔ وفاقی وزیر ءَ گوشت کہ پاکستان کراچی، پورٹ قاسم ءُ گوادر ءِ وسیلگ ءَ قازقستان ءِ کارگو ءِ واستہ بندر ءِ آسراتی ءُ کمک پجاری ءِ واستہ تیار انت، وھدیکہ آزات زون آنی تہ ءَ یکجائی منصوبگ آنی امکان آناں ھم پٹ ءُ پول کنگ بوت کنت۔ آئی ءَ گوشت کہ پاکستان ءِ دکہ قازقستان ءُ میاں اوستمانی ایشیا ءِ ایندگر ملک آنی واستہ ٹرانزٹ ہب ءِ کرد ءَ پیلو کت کن اَنت ایشی ءَ چہ خلیج ءِ ملک، افریقہ ءُ جنوب مشرقی ایشیا ءِ مارکیٹ آناں رسائی ءِ آسراتی رس ایت۔ دو نیمگی تجارت ءَ را گیش کنگ ءِ مزنیں گنجائش ءَ را پدر کنان ءَ قازقستان ءِ سفیر ءَ گوشت کہ سمندری ءُ دکہ ءِ شوبگ آنی تہ ءَ نزیکیں کمک ءَ چہ نوکیں تجارتی راہ پچ بوت کن اَنت۔ گند ءُ نند ءَ ادارگی سیادی ءَ را گیش مھکم کنگ ءُ پاکستانی دکہ آنی وسیلگ ءَ قازقستان ءِ بیپار ءَ را آسراتی دیگ ءِ واستہ عملی گامگیج آنی سر ءَ ھم ھیال ریچی کنگ بوت۔