کوروناوائرس تون مون تننگ کن اسہ ایلو نا آزموندہ غاتیان فائدہ ہرفنگ
اسلام آباد۔ 04 مئی (اے پی پی) وزیراعظم ناخصوصی کمکار جان جوڑی ڈاکٹر ظفر و ایران نا وزیر جان جوڑی ڈاکٹر نامکی دوشنبے نادے آ ویڈیو لنک انا کمک اٹ دیوان اٹی بشخ ہلکونو۔ ترجمان وزارت جان جوڑی نا رداٹ ڈاکٹر ظفر مرزا کوروناوائرس تون مون تننگ کن حکومت پاکستان نا گام گیج و بست وبند آتا بارواٹی معلومدار کرے۔ ایران نا وزیر جان جوڑی ایران حکومت نا کنڈآن کروک آ گام گیج آتے مون آ تخا۔ دیوان نا مسخت کوروناوائرس تون مون تننگ کن اسہ ایلو نا آزموندہ غاتیان فائدہ ہرفنگ ءِ۔ خصوصی کمکار ڈاکٹر ظفرمرزا پارے کہ ایران کوروناوائرس تون مون تننگ کن گچین گام گیج کرینے۔ ایرانی وزیر جان جوڑی ڈاکٹر نامکی پارے کہ پاکستان ننا برادر و ہمسایہ ملک ءِ، ایران راجی میل جول اٹ فاصلہ غا قومی پالیسی اس جوڑ کرینے ہرادے پاکستان تون شیئر کیک، پاکستان کوروناتون مون تننگ کن پبی و گچین گام گیج کرینے۔ خصوصی کمکار ڈاکٹر ظفرمرزا پارے کہ نیشنل کمانڈ اینڈ آپریشن سینٹر اس جوڑ کرینے، این سی او سی ہڑدے ئی بنداو آ حالیت آتا چاروکی ءِ کننگک، این سی او سی ٹی تعلقدار وزارت اسٹیک ہولڈرز عسکری ادارہ غاک اواری اٹ اہم فیصلہ کیرہ۔ اوپارے کہ وزیراعظم پاکستان غٹ حالیت آتے تینٹ مانیٹر کیک، پاکستان اٹی اولیکو کیس 26فروری آ رپورٹ مس، 13مارچ آ نیشنل سیکورٹی کونسل نا دیوان اٹی بھلو اہم ءُ فیصلہ کننگا۔ اوپارے کہ نیشنل سیکورٹی کونسل نا دیوان نا کماشی ءِ وزیراعظم پاکستان کرے۔ لاک ڈاؤن تون اوار یونیورسٹی کالجز اسکول آتے بند کرے، بھلا بھلا مچی تیا پابندی خلکونن، کوروناوائرس تون مون تننگ کن ٹیسٹ انا کچ اٹ ودکی نا قومی پالیسی آ روان ءِ۔ ڈاکٹر ظفرمرزا پارے کہ راجی میل و جول اٹ فاصلہ نا پالیسی ءِ پک کننگ انگ ءِ۔ اوپارے کہ تدوک آ بیست ءُ چار گھنٹہ ٹی کم و ود دہ ہزار ٹیسٹ کرینن، ہڑدے ئی بنداو آ 20ہزار ٹیسٹ انا ہدف مقرر کرینن، داوخت اسکان کم و ود اِرالکھ 13ہزار ٹیسٹ کرینن، پاکستان اٹی 80درسد کوروناوائرس لوکل ٹرانسمیشن نا سوب آن تالان مننگ ءِ۔
