اسلام آباد۔ 26جولائی (اے پی پی) بنجائی وزیر داخلہ شیخ رشید احمد پارینے کہ تحریک انصاف آزاد کشمیر اٹی ہم حکومت جوڑ کننگ والا ءِ، ہراتم اسکان نواز شریف و مسلم لیگ (ن) تینا سیاست آن غیر پارلیمانی و غیر زموارانہ زبان ءِ کشپسہ پاکستان اٹی اوفتا ہچ ءُ سیاسی آخبت اس اف، پاک فوج انا عظیم قربانی تیان پد داسہ اسہ رکھ و پرامن پاکستان اس ساڑی ءِ، اوغانستان نا سیم آ باڑ خلنگ نا کاریم 14اگست اسکان پورو کننگک، پاکستان اٹ ویزہ آن بیدس سال تیان رہینگوک آ درملکیک 14اگست اسکان پاکستان ءِ ہلر یا ویزہ کن اپلائی کیر، داحالیت اٹ اوفتا جرمانہ ءِ معاف کننگک، نادراٹی پک، پوسکنی و تصحیح نا پوسکن ءُ پالیسی اس اتنگ اُن، نورمقدم کیس اٹی کس اس تون رعایت کننگپک۔ اوغان فوجی تے جوانی اٹ اوغانستان نا حوالہ کننگک۔ دوشنبے نادے آ داڑے وزارت داخلہ ٹی پریس کانفرنس کرسا وزیر داخلہ پارے کہ تحریک انصاف آزاد کشمیر اٹی ہم حکومت جوڑ کننگ والا ءِ، پاکستان اٹی گلگت بلتستان، خیبرپختونخوا، پنجاب و بلوچستان آن پد تحریک انصاف اسٹ انگا ملک گیر جماعت جوڑ مسنے و بروک آ لس گچین کاری تیٹی پورو کوشست مریک کہ سندھ اٹی ہم حکومت جوڑکے۔ آزاد کشمیر نا گچین کاری تا بابت اوپارے کہ بنجائی حکومت آزاد کشمیرنا الیکشن کمیشن ءِ 20ہزار سول آرمڈ فورس تس، دافوج آن بیدس ءُ، پنجاب اٹی رینجرز و ایف سی ءِ اسہ جاگہ اس ہم کاریم اٹ اتنگتوحتیٰ کہ راولپنڈی ٹی ہم کاریم اٹ اتنگتو، پنجاب پولیس جوان ءُ کاریم کرے، لاہور نا کیس اٹی ہم او بھاز جوان ءُ کاریم کرے و اونا کریڈٹ پنجاب پولیس ءِ کاہک۔ وزیر داخلہ پارے کہ نواز شریف نا اینٹی آرمی، اینٹی اسٹیبلشمنٹ و اینٹی عمران خان نا اسہ ہی ایجنڈاءِ، اوداایجنڈاغا ہر حداسکان ہِننگ کن تیار ءِ، او حمداللہ محب تون ملنگ کیک و ولدا اونا دفاع ءِ ہم کننگ کیک، او مودی و جندال تون دستار بدل کننگ کیک، نواز شریف نا کوشست ءِ کہ ایف اے ٹی ایف اٹی پاکستان اختہ مرسا کے انتئے کجہ اودے داہیت انا تکلیف ءِ کہ عمران خان زرگزران ءِ گچین کننگ ءِ۔ وزیرداخلہ پارے کہ نواز شریف درو آخیریکو کلہو ءِ تس کہ او بھاز تکلیف اٹی ءِ، نن اونا کمک ءِ کننگ کن تیار اُن، شہباز شریف تو درخواست تتو، اگہ او پاکستان آ بننگ خواہک تو دمدستی اودے چارٹر جہاز اس ہم تننگ مریک، نن خوانہ کہ او پاکستان آ برے و مقدمہ غاتون مون ایتے ولے ہموکان کمپنی نا مشہوری کن اینٹی اسٹیٹ، اینٹی فوج و اینٹی عمران خان تقریرآتے کپ۔ وزیرداخلہ پارے کہ مسلم لیگ (ن) آزاد کشمیر اٹی شکست آن پد سیاپا و ہوغنگ نا بناءِ کرینے، اونا ای مہالو نمے پاریسٹ کہ داگچین کاری تے باتننگ آن پد داپارہ، کنا داریکارڈنگ ءِ نم تین تون تخبو، ان شاء اللہ 2023ء ٹی ہم ہنداپارہ کہ دھاندلی مسنے۔ اوپارے کہ ہراتم اسکان داتینا سیاست آن تینا غیر پارلیمانی و غیرزموارانہ زبان ءِ کشپسہ ہموتم اسکان پاکستان اٹی اوفتا ہچ ءُ سیاسی آخبت اس اف۔ وزیرداخلہ پارے کہ حکومت نادراٹی تصدیق، تجدید و تصحیح نا بابت پوسکن ءُ نظام اس درستی راستی کرفنگ ءِ، ایم این اے و وزیر آک ہرا840بلاک شناختی کارڈ زریلیز کرفیر اوغٹ ءِ مسترد کننگ انگ ءِ، ای چیئرمین نادرا ءِ بٹنگسا آرڈرجاری کرینٹ۔
