اسلام آباد۔ 14جولائی (اے پی پی) وزیراعظم نا سلاہکار پارلیمانی امور ڈاکٹر بابر اعوان پارینے کہ ہژدہ می ترمیم آن پد جان جوڑی نا بشخ صوبہ غاتے گدریفنگانے۔ بنجائی حکومت صوبہ غاتون اواری اٹ منشیات نا عادتی بندغ آتا بحالی کن کمک فراوان کننگ ءِ۔ چارشنبے نادے آ بڑزکو ایوان نا دیوان اٹی وقفہ سوج آتے ٹی سینیٹر بہرہ مند تنگی و ایلوفتا سوج آتا ورندی ٹی اوپارے کہ منشیات نا عادتی بندغ آتا بحالی نا ہندآک چندی شارتیٹی اریر، حیدرآباد اٹی 17ستمبر 2020ء آ اسہ بحالی ہند اسے نا بناءِ کننگا ہرا 50کٹ آتیا تالان ءِ و بحالی ہند آتے ٹی منشیات نا عادتی بندغ آتے مفت درمان و ہنکین نا آسراتی فراوان کننگک۔
