اسلام آباد۔ 07جولائی (اے پی پی) وزیر خارجہ مخدوم شاہ محمود قریشی پارینے کہ پاک چین سدابہار اسٹریٹجک کوآپریٹیو شریداری”ڈیہہ ٹی امن و سوگوی نا اسہ بنداوی ءُ ذریعہ اس جوڑ مسنے، ہفت دہائی نا ننا داسفر عظیم یک جہتی، و تین پہ تینی پت و اہم گرنچی اتون گنڈوک ءِ۔ نن پکا عزم اتون سی پیک آ پیش رفت، تفنگوک آ ڈٹ آتا وخت آ پوروی ءِ برجاو زرگزرانی و راجی شونداری آ چکار کینہ۔ نن شونداری شریداری، رابطہ غاتا استواری و علاقائی امن نا کمک اٹ پاکستانءِ اسہ شونداری سے نا کنڈآ دننگ و زرگزرانی وڑاٹ سوگو و فعال ملک اس جوڑ کننگ خوانہ۔ وزیرخارجہ چارشنبے نادے آ ’پاکستان چین ہفتاد سال: اسہ یکتا ہڑتوم آ کنڈآتا شریداری‘ نا بابت بڑزکو کہولی کانفرنس نا بنائی دیوان آن تران کریکہ۔ وزیرخارجہ پارے کہ پاکستان و چین تہذیبی شریدار ءُ۔ ننا تاریخی تعلقداری متکن آ شاہراہ ریشم نا دور آن ءِ۔ ہفت دہائی نا ننا دا سفر عظیم یکجہتی، و تین پہ تینی پت و ہم گرنچی تون گنڈوک ءِ۔ نن کلیدی فائدہ غاتا باندات آتیا اسہ ایلو نا مخ تفی ءِ کرینن۔ پاکستان مدام’ون چائنا پالیسی‘(چین نا وحدت نا پالیسی) ءِ بالادست و مقدم تخانے وخت اس کہ تائیوان، تبت، سنکیانگ، ہانگ کانگ و سویلی چین نا سمندری باندات آ چین نا مخ تفی ءِ کرینے۔ چین ننا کلیدی سٹریٹجک، زرگزرانی و شونداری اولیت آتے ٹی مدام ننا ہم کوپہ سلیسونے۔ تینا اصولی وساف موقف ءِ برقرار تخسا چین تنازعہ جموں و کشمیر آ پاکستان نا مخ تفی ءِ کرینے۔ وزیر خارجہ پارے کہ ننا”سدابہار اسٹریٹجک کوآپریٹیو شریداری“ ڈیہہ ٹی امن و سوگوی نا اسہ بنداوی ءُ ذریعہ اس جوڑ مسنے۔ پاکستان وچین نا سنگتی ہڑتوم آ ملک آتا الس نا است و ذہن اٹ بھلوروتہ اس تخرہ۔ وزیرخارجہ پارے کہ کورونا دین انا تالان مننگ آن پد چین نا کورونا نا برخلاف جنگ اٹ کمک کن پاکستان دمدستی وڑاٹ طبی گڑاچین آ روانہ کرے۔ ہنداوڑ کورونا دین انا توننگ کن چین طبی کمکی گڑاتیان پُر 60آن زیات جہاز ننے فراوان کرے۔ کورونا ویکسین اٹ ننا کمکاری ہم بے مٹ مسنے۔ چین ننے کورونا ویکسین نا 35لکھ خور(ڈوزز) ٹیکی نا وڑاٹ فراوان کرے۔ اوپارے کہ نن واپاری بنداو تیا ہم ویکسین دوئی کننگ اُن۔ اسلام آباد اٹی قومی ادارہ جان جوڑی چین نا کمک اٹ ’پاک۔ویک‘ ویکسین نا ہندی کہول آ تیاری و پیدوار نا بناءِ کرینے۔ وزیرخارجہ پارے کہ پاکستان نا چکار جیو پالیٹکس آن جیو اکنامکس نا کنڈآ بدل مسنے۔ نن شونداری شریداری، رابطہ غاتا استواری و علاقائی امن نا کمک اٹ پاکستان ءِ اسہ شونداری سے نا کنڈآ دننگ و زرگزرانی وڑاٹ سوگو و فعال ملک جوڑ کننگ خواہک۔ ’بی۔آر۔آئی‘ نا بے مٹ و ہراول ڈٹ انا وڑاٹ سی پیک ننا جیواکنامکس نا اولیت آتے ٹی کمک و کمکار ءِ۔ اوپارے کہ اولیکو ریسہ ٹی سی پیک انفراسٹرکچر (پنجر) نا شونداری، زرگزرانی نمو و شونداری ءِ مون آ دننگ کن توانائی نا ننا بنداوی گرج آتے پورو کننگ اٹ کمک کرے۔ ارٹ میکو ریسہ ٹی ننا چکار صنعتی عمل نا مون آ دننگ، کشاری کمکاری، راجی و زرگزرانی و روزگار ودی کننگ نا پلوآتیاٹی ءِ۔ سی پیک نا ڈٹ آتے ٹی بے پناہ شونداری پاکستان و چین نا اسیجائی عزم انا اشارہ کیک۔ اوپارے کہ چنکو وخت اسے ٹی نن 19ڈٹ آتے پورو کرین و 28آ تعمیراتی عمل برجاءِ۔ داکان بیدس 41ڈٹ جاٹ پیپ لائن اٹی ءُ۔ تدوک آ ہفت سال اٹی سی پیک نا توانائی و موٹروے تا ڈٹ آک 70000آن زیات نوکری ودی کرینو۔ کورونا دین آن پد ہم سی پیک بڑزکو انگا آب انا شونداری نا پوسکن آ ریسہ ٹی پترینگانے۔ اوپارے کہ نن پکا عزم اتون سی پیک آ پیش رفت، تفنگوک آ ڈٹ آتا وخت آ پوروی ءِ برجا و زرگزرانی و راجی شونداری آ چکار تخنہ۔ سی پیک نا ارٹ میکو ریسہ ٹی نن مسہ خصوصی اقتصادی زون تے اولیت تسونن۔ نن غٹ ملک آتا کاروباری خواجہ و پوریاگرتے بخیر اٹ پانہ کہ او دا’اسپیشل اکنامک زون“ تا زرگزرانی بھرم و زرکاردوست چاگڑدآن فائدہ دوئی کیر۔ وزیرخارجہ پارے کہ ننا آخبت نا سوچ دادے کہ سی پیک انفراسٹرکچر نا شونداری، علم، ڈیجیٹل، جان جوڑی و گرین راہداری تا مون آ دننگ آ مبنی”شونہالی و شونداری نا السی راہداری“ جوڑ کین۔ وزیرخارجہ پارے کہ سفارتی تعلقداری تا قیام نا 70سال پورو مننگ اسہ بھاز خاص ءُ موقع اسے۔ داوخت ءِ کہ نن پوسکن عزم اتون تدوک آ ہفت دہائی ٹی دوئی مروک آ سرسہبی تے اڈایتن و اسہ پوسکن ءُ جوزہ اسے اٹ اوفتے مون آ دین۔ کنے یقین ءِ کہ کنا داپاننگ ہرپاکستانی نا است خواہی تا درشانی ءِ کہ نن آخبت اٹ چین اتون کثیر الجہتی و برادرانہ تعلقداری تا پین مون آ دننگ نا چاری اُن ہرانئے بیرہ ننا ہڑتوم آ ملک آتا گچین تین پہ تینی فائدہ ٹی ءِ بلکن داڑآن علاقہ و دنیا ٹی امن، سوگوی، شونداری و شونہالی ہم پک مریک۔
