24گھنٹہ ٹی 1083پوسکن ءُ کیس ، 22مرک رپورٹ
ملک اٹی کوروناوائرس نا پک کیس آتا کچ20186، مرک آتا کچ 462مس
داوخت اسکان 2،12،511بندغ آتا ٹیسٹ ءِ کننگا، 5590زہمی بندغ آک دراخہ جوڑ مسنو
اسلام آباد۔ 04 مئی(اے پی پی) نیشنل کمانڈ اینڈ آپریشن سینٹر (این سی او سی) کوروناوائرس نا بابت تازہ انگا رپورٹ ءِجاری کرے۔ ملک اٹی کورونانا ایکٹیو کیس آتا کچ 14134، پک کیس آتا کچ ہم 20186اسکان سرمس۔ تدوک آ 24گھنٹہ ٹی 1083پوسکن ءُ کیس رپورٹ مس، 22پین مرک اتون اوار جم مرک آتا کچ 462مس۔ این سی او سی نا رداٹ پنجاب اٹی کوروناوائرس کیس آتا کچ غٹ آن زیات 7524اسکان سرمس۔ سندھ اٹی رپورٹ مروک آ کوروناوائرس نا کیس آتا کچ 7465، خیبر پختونخوا ٹی 3129و اسلام آباد اٹی 415مس، بلوچستان اٹی 1218و گلگت بلتستان اٹی 364کیس رپورٹ مس۔ آزاد کشمیر اٹی کوروناوائرس کیس آتا کچ 71مس۔ مچ آ ملک اٹی داوخت اسکان 5590ناجوڑ پورو وڑاٹ دراخہ جوڑ مسنو۔ این سی او سی نا رداٹ کوروناوائرس آن مرک انا باہ ٹی ہنوک آ بندغ آتا کچ 462اسکان سرمس۔ تدوک آ 24گھنٹہ ٹی 22پوسکن ءُ مرک مسنے ہرافتے ٹی سندھ اٹی 130، پنجاب اٹی 124، کے پی کے ٹی 180، گلگت بلتستان اٹی 3، اسلام آباد اٹی 4و بلوچستان اٹی 21ناجوڑ کوروناوائرس نا سوب آن زوال کرینو۔ کوروناوائرس زہمی تیٹی ہندی تالانی 84درسد وخت اس کہ درملکی سفر آن تالانی 16درسد ءِ۔ داوخت اسکان 2لکھ 12 ہزار 511بندغ آتا کوروناوائرس کن ٹیسٹ ءِ کننگا۔ تدوک آ 24گھنٹہ ٹی 9522بندغ آتا ٹیسٹ ءِ کننگا۔ ملک انا 717ہسپتال آتے ٹی جوڑ آئسولیشن وارڈآتے ٹی 3839ناجوڑ درمان مننگ ءُ۔ 173کورونازہمی تا حالیت نازرک پاننگ انگ ءِ۔
